Almatyda eski ǵımarattyń ornyna jańa Oqýshylar úıi salynyp jatyr
ALMATY. KAZINFORM — Almatyda apatty dep tanylǵan Oqýshylar úıiniń ornyna jańasy salynyp jatyr. Qala ákimi qurylys barysymen tanysty.
Qalanyń qurylys basqarmasynyń basshysy Almas Shabdarbaevtyń aıtýynsha, nysan 80 paıyzǵa daıyn. Burynǵy apatty dep tanylǵan jerde zamanaýı eki qabatty ǵımarat salynyp jatyr. Shyǵarmashylyqqa arnalǵan 12 kabınet, dárishanalar, tipti aýlanyń ishindegi baq ta bolady.
Apta saıyn oqýshylar úıinde 5-17 jas aralyǵyndaǵy 2 myń bala oqı alady. Olar úshin debat klýby, baǵdarlamalaý, 3D-modeldeý, qurastyrý, foto- vıdeomontaj boıynsha úıirmeler jumys isteıdi. Balalar sheshendik, sándik-qoldanbaly jáne beıneleý ónerin meńgeredi.
Qurylysshylardyń aıtýynsha, olar kelesi jyldyń 15 qańtaryna deıin nysannyń «kiltin» tapsyrýǵa nıetti.
Erbolat Dosaev asyǵystyqtyń qajet emes ekenin, balalar úshin barynsha qolaıly jaǵdaılar jasalýy, barlyq jabdyqtar ornatylyp, qosylyp, aýmaq abattandyrylýy tıis ekenin atap ótti.
«Bostandyq aýdanynyń soltústik bóligi úshin bul balalar shyǵarmashylyǵy ortalyǵy óte mańyzdy. Qazir balalar mektepterde oqıdy, biraq kelesi jyly osynda keledi. Biz osyndaı ǵımarattardy barlyq balalardy teń múmkindiktermen qamtamasyz etý úshin ınklıýzııa talaptaryn eskere otyryp qoljetimdi etý mindetin alǵa qoıǵanbyz», — dedi Erbolat Dosaev.
№ 3 oqýshylar úıi 55 jyl buryn qurylǵan, 1987 jyly Vahtangov kóshesi 2-2A kóshesine kóshken.Ǵımarat seısmıkalyq qaýipsizdik talaptaryna sáıkes kelmedi, akt zaly apatty jaǵdaıda boldy. Jobalyq qýaty 650 oryndyq, munda 1747 oqýshy oqydy. Qurylys kezinde úıirmeler aýdan mektepterine ýaqytsha bólindi.
Jalpy, Almatyda qosymsha bilimmen 300 myńnan astam bala qamtylǵan. Onyń ishinde 19 memlekettik bilim berý uıymdarynda 28680 bala, 102 jekemenshikte memlekettik bilim berý tapsyrysy boıynsha — 7570, mektepterde — 112851, «Damý bala» baǵdarlamasy boıynsha — 90988, aqyly negizde — 62 myńǵa jýyq bala aınalysady.
Osy jyly qala bıýdjeti esebinen Alataý, Bostandyq jáne Túrksib aýdandarynda jalpy syıymdylyǵy 2810 oryndyq 3 shyǵarmashylyq damý ortalyǵy salynyp jatyr. Jetisý aýdanynda taǵy 500 oryndyq qurylys salý josparda. Sonymen qatar, áleýmettik jaýapkershilik aıasynda jeke kompanııanyń óz qarajaty úshin Almaly aýdanynda 3500 oryndyq Oqýshylar úıiniń qurylysy júrip jatyr.
Osyǵan deıin, Almatyda qurylysy uzaqqa sozylǵan dene shynyqtyrý-saýyqtyrý kesheni kelesi jyly paıdalanýǵa beriletini týraly jazǵan edik.
