Almatyda eski bazar 7300 sharshy metrlik saýda úıine aınaldy

QR Saýda jáne ıntegratsııa vıtse-mınıstri Aıdar Ábildabekov Almaty qalasynyń halqy jáne bıznes ókilderimen kezdesip, turǵyndardy jeke qabyldady. Vıtse-mınıstr halyq aldynda esep berip, saýda salasynda atqarylǵan jumystarǵa toqtaldy.

Bıylǵy jyldyń jartyjyldyǵynyń qorytyndysy boıynsha Almaty qalasynyń ishki saýdasyndaǵy taýar aınalymynyń kólemi 12,3 trln teńgeni qurady. Saýdadaǵy naqty kólem ındeksi 105,3%-ǵa jetip, 103,9% deńgeıindegi josparly kórsetkishten asty. Almaty eldiń ishki saýdasynda 34% úleske ıe. Osylaısha, qala saýda kórsetkishi boıynsha birinshi orynda.

2026 jyldyń qańtar–maýsym aılarynda bólshek saýda kólemi 3,6 trln teńgeni qurap, naqty kólem ındeksi 103,6%-dy kórsetti. Bólshek saýdanyń óńirdiń jalpy saýda kólemindegi úlesi 29,5%-dy quraıdy.

2026 jyldyń alǵashqy alty aıynda kóterme saýda kólemi 8,6 trln teńgege jetip, naqty kólem ındeksi 106,1%-dy qurady. Kóterme saýdanyń óńirdiń jalpy saýda kólemindegi úlesi 69,9%-dy quraıdy.

Sonymen qatar saýda salasyndaǵy ınvestıtsııalyq belsendilik artyp keledi. 2026 jyldyń qańtar–maýsym aılarynda saýda salasyna tartylǵan ınvestıtsııa kólemi 161,8 mlrd teńgeni qurady.

Óńirdiń saýda ınfraqurylymynda 37 saýda bazary jumys isteıdi, onyń 31-i ámbebap, 6-y mamandandyrylǵan. Sondaı-aq 12 saýda jelisi jumys isteıdi, onyń ishinde 7 iri saýda jelisi bar: Magnum, Small, MyMart, Toimart, Metro, Interfood jáne Galmart.

Budan bólek, óńirde 4 457 «úı janyndaǵy» dúken, 21 saýda-oıyn-saýyq ortalyǵy, 29 saýda ortalyǵy jáne 42 saýda úıi jumys istep tur.

Saýda jáne ıntegratsııa vıtse-mınıstri Aıdar Ábildabekov qaladaǵy saýda bazarlaryn modernızatsııalaý jol kartasyna saı jańǵyrtýdan ótken saýda nysanyna bardy. Osyǵan deıin kóp konteınerli «Tıgrahaýd» bazary tolyq jańǵyrtýdan ótip, «Abai Plaza» saýda úıine aınalǵan.

-4,5 mlrd jeke ınvestıtsııaǵa bazarymyzdy jańǵyrtyp, qazir ony 7300 sharshy metr saýda ortalyǵyna aınaldyrdyq. Saýda úıimizde qazir 55 jalǵa alýshy bar. Olardyń 80 paıyzy burynǵy jalǵa alýshylarymyz, - dedi «Tıgrahaýd» JShS bas dırektory Azamat Shaǵytov.

Artynsha vıtse-mınıstr 1948 jyldan beri jumys istep turǵan, 80 jylǵa jýyq tarıhy bar «Bahýs» zaýytynyń jumysyn kórdi.

12 túrli ónim shyǵaratyn zaýyt tek ishki naryqtyń suranysyn qamtamasyz etip qana qoımaı, alys-jaqyn kórshi elderge de ónim satý tizbegin retke keltirgen. Qazir zaýyttyń ónimderi Reseı, Mońǵolııa, Taıland, Ózbekstan sııaqty elderge eksporttalady.

Aıta keteıik, Chennaı qalasynda ótken Qazaqstan-Úndistan saýda jáne ınvestıtsııalar jónindegi bıznes-forýmynda jalpy quny 122 mln AQSh dollaryn quraıtyn eki negizdemelik kelisimge qol qoıyldy.