Almatyda Esentaı ózeniniń jaǵalaýyn kórkeıtýge 11 mlrd teńge jumsalady
ALMATY. KAZINFORM — Almatyda Esentaı ózeniniń boıy ınvestor esebinen abattandyrylady.
Almaty ákimdiginiń málimetinshe, ınvestor bul jobany júzege asyrýǵa 11 mıllıard teńgeden astam qarjy quıyp, Ál-Farabı dańǵylynan bastap Rysqulov dańǵylyna deıingi 7,2 shaqyrym bolatyn ózen arnasyn retke keltirmek.
Qurylys jumystary kezeń-kezeńimen júzege asady. Alǵashqy kezeń — Ál-Farabı dańǵylynan Abaı dańǵylyna deıingi ýchaskede abattandyrý jumystaryn bıyl aıaqtaý josparlanǵan. Joba aıasynda ózen jaǵalaýynda jaıaý júrginshiler men velosıped joldary, jańa saıabaqtar men demalys oryndary salynady. Zamanaýı qala keńistigine saı, oryndyqtar men kógaldandyrý elementteri ornatylady.
— Sarapshylardyń pikirinshe, Esentaı ózeniniń boıyndaǵy aımaq erekshe áleýetke ıe. Ózen arnasy jasyl beldeýlerdi, turǵyn úı keshenderin, stýdenttik kampýstardy kesip ótedi ári mádenı-sporttyq nysandarǵa jaqyn ornalasqan. Arna boıyndaǵy bos jatqan jerler qosymsha kógaldandyrý men jańa skverler jasaýǵa múmkindik berip, qalanyń demalys pen týrızm turǵysynan tartymdylyǵyn arttyra túsedi, — dep habarlady qala ákimdiginen.
Eske salaıyq, buǵan deıin Almatyda qandaı kósheler ýaqytsha jabyq turǵanyn jazǵanbyz.