Almatyda Esentaı ózeniniń jaǵalaýyn kórkeıtý jobasy ázirlenip jatyr
ALMATY. KAZINFORM – Almatyda ál-Farabı dańǵylynan Rysqulov dańǵylyna deıingi Esentaı ózeni boıyndaǵy aýmaqty abattandyrý, onyń ishinde jaǵalaýdy kórkeıtý boıynsha jobalyq-smetalyq qujattama (JSQ) ázirlenip jatyr.
Almaty ákimdiginen málim etkendeı, 43 gektar jerdi kórkeıtýdiń aýqymdy jobasy ázirlenip jatyr. Qujat osy jyldyń shildesinde memlekettik saraptamadan ótpek.
Joba aıasynda ál-Farabı dańǵylynan Rysqulov dańǵylyna deıin biregeı jeti keńistik paıda bolady. Qazir jobalyq-smetalyq qujattama (JSQ) daıyndyq ústinde. Qujat shilde aıynda memlekettik saraptamadan ótedi.
– Joba boıynsha 43,2 gektar aýmaq abattandyrylady, qazirdiń ózinde jalpy uzyndyǵy 7,22 shaqyrym aımaq jańartyldy. Maqsat - zamanaýı, yńǵaıly ári úılesimdi demalys aımaǵyn qurý ári sýǵa shomylyp, jaǵalaý boıymen erkin tynystaý. Túrlengen jaǵalaý turǵyndar men qonaqtar úshin tabıǵı jáne qalalyq landshafttyń bir bóligine ári tartymdy demalys ornyna aınalady,– dep atap ótti ákimdikten.
Negizgi erekshelikteriniń biri - fýnktsıonaldy aımaqtarǵa bólý. ıAǵnı, ózen boıymen jeti biregeı keńistikti qurý josparlanǵan, olardyń árqaısysynyń ózindik tujyrymdamasy bolady:
– ál-Farabı dańǵylynan Tımırıazev kóshesine deıingi jastar aımaǵy.
– Tımırıazev kóshesinen Buqar jyraý býlvaryna deıin stýdenttik aımaq.
– Buqar Jyraý býlvarynan Abaı kóshesine deıin belsendi aımaq.
– Abaı kóshesinen Qurmanǵazy kóshesine deıin mádenı aımaq.
– Qurmanǵazy kóshesinen Jambyl kóshesine deıin tartymdy demalys aımaǵy.
– Jambyl kóshesinen Qarasaı batyr kóshesine deıin taǵy da jastar aımaǵy.
– Qarasaı batyr kóshesinen Rysqulov dańǵylyna deıingi tartymdy demalys aımaǵy.
Buǵan deıin Almatyda Esentaı ózeniniń jaǵalaýynda serýendeý aımaǵy paıda bolatyny týraly jazǵanbyz.