Almatyda Esentai Mall mańynda jańa qozǵalys kestesi engiziledi
ALMATY. KAZINFORM — Almatyda ál-Farabı dańǵylynyń Esentai Mall saýda oıyn-saýyq ortalyǵy mańyndaǵy bóliginde jol qozǵalysyn uıymdastyrý syzbasy ózgerdi. Bul shara kólik qozǵalysyn rettep, jol qaýipsizdigin arttyrý jáne júrgizýshilerdiń jolaqtardy retsiz aýystyrýyna jol bermeý maqsatynda qolǵa alyndy.
Jol qozǵalysyn uıymdastyrý jáne jolaýshylar kóligi basqarmasynyń málimetinshe, buǵan deıin saýda ortalyǵynan shyqqan júrgizýshiler birden kórshiles jolaqtarǵa aýysa alatyn. Sonyń saldarynan birneshe kólik qatar manevr jasap, sol jaq shetki jolaqqa umtylady. Bul joldaǵy qozǵalystyń baıaýlaýyna jáne kólikterdiń birkelki júrmeýine sebep bolǵan.
Endi soltústik baǵytta Úshkempirov kóshesinen Esentaı ózenine deıingi aralyqta qozǵalys syzbasy retteldi. Saýda ortalyǵynan shyqqan kólikterdiń birden jolaq aýystyrýyna shekteý qoıylyp, tutas jolaq syzyqtary syzyldy.
Endi birneshe kóliktiń bir ýaqytta manevr jasaýyn azaıyp, kólik sanyn jolaqtarǵa birkelki bólýge jáne osy ýchaskedegi qozǵalysty jeńildetýge múmkindik beriledi.
Júrgizýshilerden qozǵalys syzbasyndaǵy ózgeristerdi eskerip, jol belgileri men jol tańbalarynyń talaptaryn saqtaý jáne Jol qozǵalysy erejelerin basshylyqqa alý usynyldy.
Eske salaıyq, Almatydaǵy jol jóndeý jumystaryna baılanysty avtobýstardyń baǵyty ózgergen edi.
