Almatyda eriktilerdiń kómegimen 670 esirtki saıty buǵattaldy
ALMATY. KAZINFORM – Almaty polıtsııasynyń Esirtki qylmysyna qarsy is-qımyl basqarmasynyń jedel ýákili Sulýshash Dosbolova esirtkige qatysty saıttardy anyqtaýda eriktilerdiń kómegi kóp ekenin aıtty.
Onyń aıtýynsha, jyl basynan beri polıtsııa men eriktilerdiń birikken jumysynyń arqasynda esirtki taratatyn 670 saıt pen Telegram-arna anyqtalǵan jáne buǵattalǵan. Ol narkoresýrstardy ınternet keńistigin baqylaý arqyly, senim telefonyna kelip túsken ótinishter jáne «E-Ótinish» platformasy arqyly, sondaı-aq jedel arnalar arqyly anyqtalatynyn atap ótti.
- Bir jaǵy azamattar arqyly, bir jaǵynan ózimiz de áleýmettik jelini baqylap, zańsyz resýrs týraly aqparatty birneshe derekkózden alyp otyramyz. Anyqtalǵan resýrsty keıin «Kıbernadzor» júıesine joldap, ony buǵattaımyz, – dedi Sulýshash Dosbolova.
Polıtsııa ókiliniń aıtýynsha, barlyq saıttar birden jabyla bermeıdi. Keıde zańsyz zattardy taratýshylardy anyqtaý úshin buǵattaý sharalary keıinge shegeriledi.
- Azamattardan kelip túsetin aqparat qaýipti jedel anyqtap, sheshim qabyldaýǵa múmkindik beredi. Esirtki taratatyn narkosaıtty, Telegram-arna men esirtki jarnamalap jatqandardy kórseńiz, +7 700 113 0102 WhatsApp nómirine nemese Narko Shekteu Almaty telegram-kanalyna habarlap aıtýǵa bolady, - dedi ol.
Eske salaıyq, Qazaqstannyń esirtkige qarsy tsıfrlyq tájirıbesi sheteldikterdi qyzyqtyrdy.