Almatyda erekshe «parık aǵash» gúldedi
ALMATY. KAZINFORM — Almatynyń botanıkalyq baǵynda bylǵary skýmpııa gúldep tur.
Botanıkalyq baq málimetinshe, skýmpııa «parık aǵashy» degen ataýmen de belgili. Ol — Anacardiaceae tuqymdasyna jatatyn buta. Tabıǵı jaǵdaıda Batys Eýropada, Balqan túbeginde, Túrkııada, Kavkazda, Qytaıda jáne Úndistanda kezdesedi.
— Skýmpııanyń basty ereksheligi — onyń sypyrtqy tárizdi gúlshoǵyrlary. Aǵash gúldegen soń olar aýadaı jeńil, úlpildek bolady, parıkke uqsaıdy. Jazda ósimdik tuman sııaqty áser beredi, al kúzde japyraqtary sarydan qanyq qyzyl túske deıin ózgerip, jyly reńkke boıalady, — dep jazdy baqtyń baspasóz qyzmeti.
Skýmpııanyń taǵy bir ereksheligi — onyń japyraqtarynda matalardy sary jáne qyzǵylt-sary túske boıaýǵa qoldanylatyn tabıǵı boıaǵysh fızetın bar. Sondaı-aq bul ósimdiktiń ártúrli bólikteri dástúrli medıtsınada qoldanylady.
Eske salaıyq, 1 maýsym kúni Qyzylordada botanıkalyq baq paıdalanýǵa berildi.
