Almatyda erekshe qajettilikteri bar adamdardy jumysqa ornalastyrý jobasy iske qosylady

ALMATY. KAZINFORM – Múmkindigi shekteýli azamattar Almatyda jumysqa ornalasý úshin jańa múmkindikterge ıe bolady.

Almaty ákimdiginen málim etkendeı, bıyl Jobcoach jobasy iske qosylady. Bul baǵdarlama erekshe qajettilikteri bar adamdardy 3 jyl boıy turaqty jumys ornynda tolyq beıimdelgenge deıin qoldaýǵa baǵytalǵan.

Tálimgerler jumys tabýǵa jáne jumys ornynda beıimdelýge kómektesedi. Jobcoach jobasy aıasynda osy sanattaǵy 300 azamat jumysqa ornalasady.

Sondaı-aq «Altyn jas» jobasy jalǵasady. Zeınet jasyndaǵy adamdar úshin 1000 jumys ornyn sýbsıdııalaý josparda.

– 2024 jyly Almatyda zeınetkerlerdiń jalaqysyn jergilikti bıýdjetten eń tómengi jalaqy mólsherinde sýbsıdııalaı otyryp, olardy jumysqa ornalastyrý úshin «Altyn jas» baǵdarlamasy iske qosyldy. Baǵdarlama 700 - den astam adamdy qamtydy, 2025 jyly 1000 zeınetkerdi qoldaý josparlanýda, – dep atap ótti Jumyspen qamtý jáne áleýmettik baǵdarlamalar basqarmasy.

Aıta keteıik, erekshe qajettilikteri bar adamdardy qosa alǵanda, halyqtyń mobıldiligi tómen toptary úshin kedergilerdi joıýǵa jáne quqyqtardyń teńdigin qamtamasyz etýge basty nazar aýdarylady.

Buǵan deıin Almatyda jumyssyzdyq deńgeıi 4,6 paıyzǵa tómendegeni týraly jazǵanbyz.