Almatyda erekshe balalarǵa arnalǵan jeke mektep daýy: qandaı sheshim qabyldandy
ALMATY. KAZINFORM — Almatyda erekshe balalarǵa arnalǵan jekemenshik «Pedagog akademııasy» mektebi tóńiregindegi daý áli de basylmaı keledi.
Ata-analar qalalyq bilim basqarmasy tarapynan usynylǵan № 15 mektep-ınternatyna balalaryn berýge qarsy ekenderin aıtyp otyr.
Olardyń sózinshe, № 15 mektep-ınternaty týberkýlezdiń jeńil túrimen aýyratyn balalarǵa arnalǵan. Onyń ekinshi bóliginde erekshe bilim berý qajettilikteri bar balalarǵa arnalǵan arnaıy túzetý mektebi ashylmaq.
— Biz, ata-analar, bul sheshimge úzildi-kesildi qarsymyz. Balalarymyzdyń densaýlyǵynda ózindik erekshelikteri bar. Sondyqtan olardy týberkýlez ınfektsııasyn juqtyrý qaýpi bar ortaǵa ornalastyrýǵa kelispeımiz. Bizge basqa mektep kerek emes. Bizge óz mektebimiz — «Pedagog akademııasy» qajet, — delingen ata-analar málimdemesinde.
Bul jaǵdaıǵa baılanysty bilim basqarmasy jaýap berdi. Resmı málimetke sáıkes, qazir barlyq balany № 15 mektep-ınternatyna mindetti túrde kóshirý týraly sheshim qabyldanbaǵan. Kerisinshe ár balanyń jeke bilim berý qajettilikterin eskere otyryp, olardyń bilim alýyn jalǵastyrýdyń birneshe nusqasyn usynylǵany habarlandy.
— Ata-analar úshin № 15 arnaıy mektep-ınternatynyń bazasynda tanystyrý ekskýrsııasy uıymdastyryldy. Mekemeniń materıaldyq-tehnıkalyq bazasy, balalardy oqytý jaǵdaılary jáne túzetý-damytý jumystarynyń múmkindikteri tanystyryldy. Keıin atalǵan mekemede Almaty qalasynyń barlyq 8 aýdanyndaǵy psıhologııalyq-medıtsınalyq-pedagogıkalyq konsýltatsııa (PMPK) mamandarynyń jumysy uıymdastyryldy. Mamandar ata-analar men balalardy qabyldap, olardyń qalaýy boıynsha tekserý júrgizip, balanyń jeke qajettilikterine sáıkes bilim berý baǵyty jóninde usynymdar beredi, — dep habarlady vedomstvodan.
Sonymen qatar № 15 jáne № 7 arnaıy mektep-ınternattary arasynda tıisti shart jasalǵan. Onyń aıasynda № 15 mektep-ınternatynyń bazasynda № 7 arnaıy mektep-ınternatynyń fılıalyn uıymdastyrý kózdelgen.
— Bul erekshe bilim berý jaǵdaılaryn qajet etetin balalarǵa usynylatyn nusqalardyń biri ǵana. Balalardyń bilim alýyn jalǵastyrý máselesi ata-analarmen birlesip, PMPK usynymdary negizinde qarastyrylady, — dep habarlady basqarmadan.
Sondaı-aq vedomstvo ókilderi № 15 arnaıy mektep-ınternatynda áleýmettik qoldaýdy qajet etetin otbasylardan shyqqan balalar tárbıelenetinin atap ótti. Atap aıtqanda: az qamtylǵan, kópbalaly jáne balany jalǵyz tárbıelep otyrǵan otbasylardyń balalary bar.
— Munda balalardyń týberkýlezben aýyratyndary jaıly aqparat shyndyqqa janaspaıdy, — dep naqtylady vedomstvodan.
Almaty qalasynyń bilim basqarmasy «Pedagog akademııasy» mektebin qarjylandyrýǵa qatysty da túsinikteme berdi. Jeke uıymda 268 bala tirkelgen. Onyń 56-sy túzetý synyptarynda, 212-si úıde oqytý nysany boıynsha kórsetilgen. Al mekteptiń sanıtarııalyq-epıdemıologııalyq qorytyndysynda tek 60 oryn qarastyrylǵan.
— Uıym usynǵan qujattardy zerdeleý barysynda memlekettik bilim berý tapsyrysyn ornalastyrý talaptaryna sáıkes kelmeýi anyqtaldy. Memlekettik bilim berý tapsyrysy bıýdjet qarajaty esebinen qarjylandyrylatyndyqtan, ony ornalastyrý tek zańnamada belgilengen talaptar tolyq saqtalǵan jaǵdaıda ǵana júzege asyrylady, — delingen jaýapta.
Eske salaıyq, buǵan deıin Almatyda ornalasqan «Pedagog akademııasy» jekemenshik ınklıýzıvti bilim berý mektebine qatysty ata-analar másele kótergenin jazǵanbyz.
