Almatyda erekshe balalarǵa arnalǵan «Pıoner» kýrortynyń tóńireginde daý týyndady
ALMATY. KAZINFORM – Almatyda «Pıoner» kýrortynyń jeri memleket muqtajyna alynady. Bul sheshimge keı turǵyndar qarsy.
Áleýmettik jelide qoǵam qaıratkeri Janat Qarataı Almaty ákimdigi memleket tapsyrmalaryn burmalap otyrǵanyn jazdy.
Onyń aıtýynsha, bıyl 27 sáýirde Almaty qalasy ákimdiginiń №2/195-562 resmı qaýlysyn alǵan. Qujatta shamamen 2 gektar jerdi memlekettik qajettilik úshin — Almaty taý klasterine arnalǵan arqan joly stantsııalaryn salý maqsatynda alynatyny kórsetilgen.
- Týrızm basqarmasy men Almaty ákimdigi temirbeton tirekter men arqan joldy Qazaqstandaǵy jalǵyz ınklıýzıvti taýly kýrorttan mańyzdyraq dep sheshken sııaqty. Olar Almaty taý klasteri baǵdarlamasynyń atyn jamylyp, dál osy klasterdiń maqsaty bolýy tıis áleýmettik jobany joıýǵa áreket etip otyr. Biz bul kýrortty bermeımiz, - dep jazdy ol.
Ol bul sheshimdi sot tártibimen daýlaýǵa daıyndalyp jatqanyn atap ótti.
Atalǵan shaǵymǵa baılanysty Almaty qalasynyń Týrızm basqarmasy jaýap berdi. Vedomsto málimetinshe, «Pıoner» taý kýrorty jabylady degen aqparat shyndyqqa sáıkes kelmeıdi jáne negizsiz bolyp esepteledi.
- Kýrort aýmaǵy Almaty taý klasterin damytý jobasy aıasynda basym baǵyttardyń biri retinde qarastyrylyp otyr. Joba zamanaýı ári qaýipsiz taý ınfraqurylymyn qalyptastyrýdy kózdeıdi. Bul rette ınjenerlik jelilerdi jańartý, aspaly jáne basqa da joldardy, qar kóshkininen qorǵaý jáne monıtorıng júıelerin engizý, sondaı-aq qysqy maýsymnyń turaqtylyǵyn qamtamasyz etý maqsatynda jasandy qar júıesin ornatý josparlanǵan, - delingen basqarma jaýabynda.
Sonymen qatar týrızm basqarmasynyń ókilderi balalarǵa, onyń ishinde erekshe qajettiligi bar balalarǵa arnalǵan ınklıýzıvti jáne beıimdelgen baǵdarlamalardy saqtaý jáne damytýǵa aıryqsha kóńil bólinetinin atap ótti.
- Kýrorttyń qoldanystaǵy ınfraqurylymy qaıta jańartýdy qajet etedi jáne qaýipsizdik talaptaryna, onyń ishinde qar kóshkininen qorǵaý júıesine tolyq sáıkes kelmeıdi. Osyǵan baılanysty aýmaqty keshendi damytý maqsatynda zańnamada belgilengen tártippen memleket muqtajy úshin jer telimin alý kózdelip otyr, - dep túsindirdi basqarmadan.
Jobany iske asyrý 2027 jyly bastalady.
Eske salaıyq, buǵan deıin Almaty taý klasterin qalyptastyrý, onyń ishinde arqan jol stantsııalarynyń qurylysy úshin Medeý aýdany, Alma-taý kóshesi boıynda ornalasqan 4 jer ýchaskesi memleket muqtajyna alynatynyn jazǵanbyz.
