Almatyda erekshe balalardyń ata-anasyna arnalǵan Smart Mental mektebi iske qosyldy
ALMATY. KAZINFORM — Almaty qalalyq balalardy ońaltý ortalyǵynda aqyl-oı kemistigi bar balalardy tárbıelep otyrǵan otbasylardy qoldaýǵa baǵyttalǵan jańa joba — Smart Mental sanaly oılaý mektebi jumysyn bastady.
Almaty qalasynyń qoǵamdyq densaýlyq saqtaý basqarmasynyń málimetinshe, joba ata-analardy qoldaýǵa jáne balanyń damýyna qatysty olardyń biliktiligin arttyrýǵa baǵyttalǵan.
— Negizgi maqsat — otbasylarǵa balalardyń minez-qulqy men qajettilikterin tereńirek túsinýge, kúndelikti qıyndyqtardy senimdi túrde eńserýge jáne ońaltý protsesine sanaly túrde qatysýǵa kómektesý, — dep túsindirdi basqarmadan.
Mektep aıasynda pedagogter, psıholog jáne logoped-defektologtardyń qatysýymen praktıkalyq sabaqtar ótkiziledi. Ata-analar qoljetimdi ári qoldanbaly bilim alyp, úı jaǵdaıynda paıdalanýǵa bolatyn daǵdylardy meńgeredi. Bul daǵdylar psıho-sóıleý damýy tejelgen, aýtızm spektriniń buzylystary, Daýn sındromy jáne basqa da ıntellektýaldyq buzylysy bar balalarmen qarym-qatynasta, oqytýda jáne kúndelikti kútimde qoldanylady.
Oqý baǵdarlamasyn aıaqtaǵan qatysýshylarǵa ony ótkeni týraly kýálik beriledi. Ortalyq mamandarynyń aıtýynsha, jumystyń bul formaty mamandar men otbasy arasynda seriktestik ornatýǵa múmkindik beredi jáne ár bala úshin ońaltý protsesiniń tıimdi ári turaqty bolýyna yqpal etedi.
— Qalalyq balalardy ońaltý ortalyǵyna joldamany mindetti áleýmettik medıtsınalyq saqtandyrý (MÁMS) aıasynda tirkelgen jeri boıynsha emhanadan tegin alýǵa bolady, — dep habarlady vedomstvo.
Eske salaıyq, buǵan deıin Almaty dárigerleri salmaǵy 730 gramm bolyp týǵan sábıdi aman alyp qaldy.
