Almatyda erekshe balalar oqıtyn mekteptiń qarjylandyrylýy toqtatyla ma
ALMATY. KAZINFORM — Almatyda erekshe balalarǵa arnalǵan jekemenshik mektebin qarjylandyrý toqtatylmaq.
Almatyda ornalasqan «Pedagog akademııasy» jekemenshik ınklıýzıvti bilim berý mektebine qatysty ata-analar másele kóterdi. Olardyń aıtýynsha, shamamen 270 bala bilim alatyn mekemede memlekettik qarjylandyrý tek 120 balaǵa saqtalýy múmkin. Sebebi jańa talaptar boıynsha úıde oqıtyn balalar mekteptiń jobalyq qýatyna engizilmek. Al mektep dırektory balalardy ekige bólip, bir bóligine tegin bilim berip, ekinshi bóligine oqý aqysyn ata-analardyń ózderine tóleýdi usyna almaıtynyn aıtqan.
— Bizdiń balalarymyz úshin bul jaı ǵana mektep emes. Bul — olardyń bilim alýyna, áleýmettenýine jáne qajetti jaǵdaılar men qoldaý alýyna múmkindik beretin orta, — deıdi ata-analar.
Atalǵan jaǵdaıǵa baılanysty Almaty qalasy bilim basqarmasynyń basshysy Sáken Aralbaev beıneúndeý jasady. Onyń aıtýynsha, basqarma mektepti jabý týraly sheshim qabyldap otyrǵan joq. Al qaralyp otyrǵan másele — memlekettik bilim berý tapsyrysyn ornalastyrý boıynsha belgilengen talaptardyń saqtalýyna qatysty.
— Bul másele nelikten týyndady? Ulttyq bilim berý derekter qorynyń málimetine sáıkes, atalǵan bilim berý uıymynda 268 oqýshy tirkelgen. Onyń ishinde 56 bala túzetý synyptarynda bilim alady, al 212 bala úıde oqıtyn oqýshylar retinde kórsetilgen. Sonymen qatar qoldanystaǵy sanıtarlyq-epıdemıologııalyq qorytyndyǵa sáıkes, nysan bastaýysh synyp oqýshylarynyń, ıaǵnı 1–4 synyp balalarynyń qysqa merzimde bolýyna arnalǵan jáne 60 orynǵa eseptelgen. Qujattardy qaraý barysynda sáıkestendirýdi jáne qosymsha tekserýdi qajet etetin birqatar máseleler anyqtalyp otyr. Atap aıtqanda, jekelegen oqýshylardyń rastaıtyn qujattaryna jáne kontıngentti qalyptastyrý jónindegi málimetterge qatysty suraqtar bar, — dep túsindirdi vedomstvo basshysy.
Sáken Aralbaev bilim basqarmasy kontıngentti qalyptastyrýdyń jáne qarjylandyrýdyń zańdylyǵyna tekserý júrgizýge bastamashylyq jasaǵanyn atap ótti. Onyń sózinshe, jekemenshik mektep basshylyǵy qujattardy belgilengen talaptarǵa sáıkestendirýi qajet.
— Eń aldymen, mektep qyzmetiniń naqty jaǵdaılaryna sáıkes keletin tıisti sanıtarlyq-epıdemıologııalyq qorytyndy alý qajet. Ata-analarǵa jeke toqtalyp, taǵy bir mańyzdy máseleni aıryqsha atap ótkim keledi. Qalyptasqan jaǵdaı mektepte erekshe bilim berý qajettilikteri bar balalardyń bilim alýymen baılanysty emes. Olardyń bilim alý nemese qajetti súıemeldeý qyzmetterin alý quqyqtary shekteý týraly másele kóterilip otyrǵan joq, — dedi ol beıneúndeýde.
Basqarma basshysynyń aıtýynsha, atalǵan uıymǵa jaqyn aýmaqta bos oqýshy oryndary bar memlekettik mektepter ornalasqan. 3 shaqyrym radıýstaǵy 4 memlekettik mektepte jalpy sany 705 bos oryn bar. Olarda erekshe bilim berý qajettilikteri bar balalarǵa qajetti psıhologıologııalyq-pedagogıkalyq qoldaý máselesi jeke qarastyrylmaq.
— Bul máselede balanyń múddesi árdaıym birinshi orynda turýy qajet jáne ol qandaı da bir uıymnyń qarjylyq nemese kommertsııalyq múddelerine táýeldi bolmaýy kerek. Bizdiń mindetimiz — qandaı da bir naqty jekemenshik mektepti kez kelgen jaǵdaıda qarjylandyrý emes, bizdiń maqsatymyz — árbir balanyń sapaly, qaýipsiz jáne úzdiksiz bilim alý quqyǵyn qamtamasyz etý, — dep qorytyndylady Sáken Aralbaev.
Eske salaıyq, jyl basynda «Pedagog akademııasy» jekemenshik mektebiniń jabylýyna qatysty másele kóterilgen edi. Ol kezde de mektep ǵımaratynyń talaptarǵa sáıkes kelmeýi sóz bolǵan.
