Almatyda er adam temirjol stantsııasy mańynda ózine qol salmaq boldy
ALMATY. KAZINFORM — «Almaty-1» temirjol stantsııasy mańynda er adam ózine qol salmaq boldy.
Oqıǵa týraly aqparat polıtsııaǵa joldan ótip bara jatqan turǵynnan túsken.
Jedel jetken arnaıy jasaq qyzmetkerleri qolynda pyshaǵy bar, emotsııalyq kúızelis jaǵdaıyndaǵy er adamdy anyqtady. Ol óz áreketiniń sebebin túsindire almaǵan.
Keıin ol medıtsınalyq jáne psıhologııalyq kómek kórsetý úshin dárigerlerge tapsyryldy.
— Bizdiń qyzmetkerler óte jyldam ári saq áreket etti. Eń bastysy, adam ómirin saqtap qalý boldy. Azamattyń qyraǵylyǵy men Jyldam qımyldaıtyn arnaıy jasaq jaýyngerleriniń jedel jumysynyń arqasynda qaıǵyly jaǵdaıdyń aldyn aldyq, — dedi Almaty polıtsııa departamenti Jyldam qımyldaıtyn arnaıy jasaq komandıri Azamat Iserǵojın.
Polıtsııa departamenti der kezinde habar bergen turǵyndarǵa alǵys aıtyp, azamattardy ómir men densaýlyqqa qaýip tóndiretin kez kelgen jaǵdaı týraly «102» nómirine dereý habarlaýǵa úndedi.
Eske salaıyq, buǵan deıin Almaty áýejaıynda 33 jastaǵy turǵynnyń ózin órtemek bolǵan áreketine baılanysty bastalǵan qylmystyq tergeý toqtatylǵanyn habarlaǵanbyz.
Bul derek boıynsha Qylmystyq kodekstiń 105-babynyń 1-bóligi (Ózin-ózi óltirýge deıin jetkizý, ózin-ózi óltirýge kóndirý nemese ózin-ózi óltirýge yqpal etý) boıynsha sotqa deıingi tergeý júrgizilgen. Alaıda er adam aýrýhanadan shyqqannan eshkimge shaǵymy joq ekeni týraly jazbasha ótinish bergen.