Almatyda er adam áıelin óltirip, artynsha ózine qol saldy

ALMATY. KAZINFORM — Almatyda er adam otbasylyq janjal kezinde áıelin óltirip, keıin óz-ózine qol saldy.

Oqıǵa týraly aqparat áleýmettik jelide tarady. Qaıǵyly oqıǵa Dýman yqshamaýdanynda bolǵan.

40 jastaǵy er adam 38 jastaǵy áıelin pyshaqtap óltirip, keıin Almaty oblysyndaǵy týystaryna barǵan soń óz-ózine qol jumsaǵan.

Almatydaǵy páterde áıeldiń máıitin onyń týysy taýyp alǵan.

Bul derekti Almaty polıtsııa departamentiniń baspasóz qyzmeti Kazinform tilshisine rastady.

— Kisi óltirý faktisi boıynsha Medeý aýdandyq polıtsııa basqarmasyna qarasty polıtsııa bólimi qylmystyq is qozǵady. Aldyn ala málimetterge sáıkes, qylmys otbasylyq janjal saldarynan bolǵan. Er adam áıelimen janjaldasyp, oǵan pyshaq jaraqatyn salǵan. Keıin ózine qol jumsaǵan, — delingen habarlamada.

Qazirgi ýaqytta oqıǵanyń basqa da mán-jaıy anyqtalyp jatyr.

Eske salaıyq, buǵan deıin Aqtóbede áıelin uryp óltirgen er adamǵa 8 jylǵa sottalǵanyn habarlaǵan edik.