Almatyda er adamdy pyshaqtap, kóligin alyp ketken kúdikti ustaldy
ALMATY. KAZINFORM – Almatynyń Almaly aýdanynda avtokólikti qaıta satý mámilesi kezinde jasalǵan qaraqshylyq shabýyl jedel túrde ashyldy.
Polıtsııanyń aldyn ala málimetinshe, eki azamat avtokólikke qatysty mámileniń sharttaryn talqylaý úshin kezdesken. Alaıda kelissóz barysynda olardyń arasynda janjal shyǵyp, sońy aýyr qylmysqa ulasqan.
Tergeý deregine qaraǵanda, kúdikti jábirlenýshiniń bank kartasynda qomaqty qarajat bar ekenin bilip, oǵan pyshaq jaraqatyn salǵan. Keıin jábirlenýshiniń avtokóligin ıemdenip, oqıǵa ornynan boı tasalaǵan. Zardap shekken azamat shuǵyl túrde aýrýhanaǵa jetkizildi. Qazir oǵan qajetti medıtsınalyq kómek kórsetilip jatyr.
Oqıǵa týraly habar túsken boıda Almaty aýmaǵynda «Ustaý» arnaıy jospary engizildi. Barlyq patrýldik jasaqqa kúdiktini anyqtaý jáne urlanǵan kólikti izdestirý tapsyryldy.
Jedel-izdestirý sharalarynyń nátıjesinde kúdiktiniń júrgen jeri az ýaqyt ishinde anyqtalyp, Raıymbek dańǵyly boıynda qolǵa tústi. Odan iske qatysty zattaı dáleldemeler tárkilendi.
Qazirgi ýaqytta kúdikti ýaqytsha ustaý ızolıatoryna qamaldy. Atalǵan derek boıynsha sotqa deıingi tergep-tekserý amaldary júrgizilip jatyr. Tergeý barysynda oqıǵanyń barlyq mán-jaıy anyqtalady.
Eske salaıyq, buǵan deıin Almaty oblysy Talǵar aýdany Nura aýylynda er adam pyshaq jaraqatynan mert bolǵanyn jazǵan edik.
