Almatyda er adam dárigerlerdi qorqytyp, pyshaq ala júgirgen

ALMATY. KAZINFORM — Almatyda jedel járdem qyzmetkerlerine qatysty agressııa kórsetý deregi boıynsha qylmystyq is tirkeldi.

Jelide oqıǵa kezinde túsirilgen vıdeo tarady.

Polıtsııanyń málimetinshe, oqıǵa Jetisý aýdanynda bolǵan. Shaqyrtý boıynsha kelgen jedel medıtsınalyq kómek brıgadasyn naýqastyń mas kúıdegi uly qarsy alyp, ózin agressıvti ustaǵan. Ol dárigerlerdi páterde qamap, qorqytyp, aınaladaǵylarǵa qaýip tóndiretin zattardy kórsetken.

Medıtsınalyq qyzmetkerler oqıǵa ornynan áreń shyǵyp úlgergen. Alaıda er adam olardy pyshaqpen qýyp, qýdalaýyn jalǵastyrǵan.

Atalǵan fakti boıynsha Almatynyń Jetisý aýdany polıtsııa basqarmasy Qazaqstan Respýblıkasy Qylmystyq kodeksiniń 380-3-baby boıynsha qylmystyq is qozǵady.

— Quqyq buzýshy ustalyp, ýaqytsha ustaý ızolıatoryna qamaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr, - delingen habarlamada.

Polıtsııa ókilderi qyzmettik mindetin atqaryp júrgen jedel qyzmet mamandaryna qatysty kez kelgen agressııa men qorqytý áreketteri zańmen qýdalanatynyn eskertti.

Eske salaıyq, buǵan deıin Qazaqstanda Qylmystyq kodekstegi medıtsına qyzmetkerlerine qatysty fızıkalyq kúsh qoldaný men qorqytý áreketteri úshin jazany kúsheıtý týraly ózgerister kúshine engenin jazǵanbyz.