Almatyda er adam azyq-túlik dúkeninde áıelge qaraqshylyq shabýyl jasady

ALMATY. KAZINFORM – Almatyda azyq-túlik dúkeninde jasalǵan shabýyl men tonaý qylmysy ashyldy. 

Almaty polıtsııa departamentiniń habarlaýynsha, qylmys qaladaǵy azyq-túlik dúkenderiniń birinde bolǵan. Beıtanys er adam áıelge shabýyl jasap, onyń denesin jaraqattaǵan. Keıin altyn buıymyn urlap, oqıǵa ornynan qashyp ketken. 

Jábirlenýshige der kezinde medıtsınalyq kómek kórsetildi. Bul derek boıynsha qylmystyq is qozǵaldy.

Jedel-izdestirý is-sharalary kezinde kúdikti anyqtalyp, ustaldy. Urlanǵan múlik tárkilenip, qylmystyq istiń materıaldaryna tirkeldi. Kúdikti ýaqytsha ustaý ızolıatoryna qamaldy. Sotqa deıingi tergep-tekserý jalǵasyp jatyr.

– Krımınaldyq polıtsııa qyzmetkerleriniń aýmaqtyq bólimshemen birlesken úılesimdi ári kásibı áreketteriniń nátıjesinde kúdikti az ýaqyt ishinde ustaldy. Qylmystyń barlyq mán-jaıy anyqtalyp, urlanǵan múlik qaıtaryldy. Qoǵamdyq qaýipsizdikti qamtamasyz etý jáne jasalǵan qylmystar úshin jazanyń bultartpastyǵy qaǵıdatyn saqtaý baǵytyndaǵy jumys jalǵasa beredi, - dedi Almaty polıtsııa departamenti krımınaldyq polıtsııa basqarmasynyń bastyǵy Ashat Dáýletııarov.

Eske salaıyq, buǵan deıin Almatyda reıderlik shabýyl jasaǵan bir top adam ustalǵan edi.