Almatyda epıdahýal jaqsardy: JRVI juqtyrǵandar 2,5 ese azaıǵan

ALMATY. KAZINFORM — Almaty sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova qaladaǵy JRVI men tumaý boıynsha epıdjaǵdaı týraly aıtty.

Onyń sózinshe, ótken aptada Almatyda 13 083 JRVI jaǵdaıy tirkelgen. Oǵan deıingi aptamen salystyrǵanda juqpaly aýrý juqtyrǵandar sany 2,5 ese azaıǵan. Ol kezde 32 456 adam bolǵan edi. Naýqastardyń basym bóligi balalar — 60,9% nemese 7 964 jaǵdaı.

— Ótken aptada qalanyń 176 mektebinde 978 JRVI jaǵdaıy tirkeldi, oqýshylar arasyndaǵy syrqattanýshylyq shekti deńgeıden (10,0%-ǵa deıin) aspaıdy, oqý protsesi shtattyq rejımde jalǵasyp jatyr, — dedi Ásel Qalyqova.

SEB departamentiniń ókili epıdemıologııalyq maýsym bastalǵaly beri qalada A/H3N2 (gonkong) tumaýynyń 73 jaǵdaıy tirkelgenin atap ótti. Barlyq naýqastarǵa tıisti em taǵaıyndalǵan.

— Turǵyndar JRVI men tumaýdyń ósý kezeńinde profılaktıkanyń jalpy sharalaryn umytpaýy tıis. Ol — ımmýnıtetti nyǵaıtý, kópshilik jınalatyn oryndarǵa barýdy azaıtý, bólmelerdi jeldetý jáne JRVI juqtyrǵan adamdarmen baılanystan aýlaq bolý. Sondaı-aq aýrý belgileri paıda bolǵan ózin-ózi emdeýmen aınalyspaý, aýyrǵan balalardy mektepke, balabaqshaǵa, jibermeý. Osy qarapaıym erejelerdi saqtaý sizdi tumaý men JRVI juqtyrýdan qorǵaýǵa kómektesedi, — dedi Ásel Qalyqova.

Eske salaıyq, aldyńǵy apta Almatyda JRVI juqtyrǵandardyń sany 17 paıyzǵa artqanyn jazǵanbyz.