Almatyda endi ınklıýzıvti talapqa saı emes nysandar paıdalanýǵa berilmeıdi
ALMATY. KAZINFORM – Almatyda 1 shildeden bastap múgedektigi bar adamdar úshin jańa nysandardyń qoljetimdiligine baqylaý kúsheıtiledi.
Halyqty áleýmettik qorǵaý salasyndaǵy retteý jáne baqylaý komıtetiniń Almaty qalalyq departamentiniń basshysy Murat Muratbekovtiń aıtýynsha, 2026 jylǵy 1 shildeden bastap Qazaqstan Respýblıkasynyń jańa Qurylys kodeksi kúshine enedi. Bul qujat nysandardyń qoljetimdilik talaptaryna sáıkestigi týraly deklaratsııany bekitý tártibin ózgertedi.
Endi deklaratsııany bekitý protsesine Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentteri de qatysady. Osylaısha, nysandardyń qoljetimdilik talaptaryna sáıkestigin baqylaý jergilikti atqarýshy organdardan salalyq memlekettik qurylymdarǵa ótedi.
Vedomstvo basshysynyń sózinshe, jańa tetik nysandardy múgedektigi bar adamdarǵa beıimdeý sapasyna baqylaýdy kúsheıtedi.
– Endi tek pandýstyń bar-joǵy ǵana emes, onyń sapasy, kireberis aımaqtardyń, sanıtarlyq toraptardyń, lıftilerdiń, taktıldi belgilerdiń jáne basqa da elementterdiń qoljetimdiligi erekshe nazarda bolady, - dedi Murat Muratbekov Óńirlik kommýnıkatsııalar qyzmetinde ótken brıfıng kezinde.
Jańa talaptar qurylys salýshylar men menshik ıeleriniń jaýapkershiligin arttyrady. Qoljetimdilik talaptaryna sáıkes keletinin rastaıtyn deklaratsııa – nysannyń zańnama men qurylys normalaryna saı ekenin dáleldeıtin resmı qujat.
Departament ókilderiniń aıtýynsha, jańa talaptardyń maqsaty – tek qaǵaz júzinde oryndaýdy toqtatý. Endi árbir nysan múgedektigi bar adamdarǵa qyzmetterdi eshkimniń kómeginsiz, erkin ári qaýipsiz paıdalana alatyndaı jaǵdaı jasaýy kerek.
Sonymen qatar buzýshylyqtardyń aldyn alý qurylys kezeńinde-aq qarastyrylady. Talaptarǵa saı kelmeıtin nysandar paıdalanýǵa berilmeıdi. Deklaratsııaǵa qol qoıylǵannan keıin de olar memlekettik baqylaýda qalady, al buzýshylyq anyqtalǵan jaǵdaıda ıeleri ákimshilik jaýapkershilikke tartylady. Qoljetimdi orta tek ǵımarattarmen shektelmeıdi. Ol kólik, tsıfrlyq qyzmetter, aqparat pen kommýnıkatsııa, sondaı-aq ámbebap dızaın qaǵıdalaryn qamtıdy.
Departament derekterine sáıkes, búginde Almatyda qalalyq ınfraqurylymnyń 9 myńnan astam nysany ınteraktıvti qoljetimdilik kartasyna engizilgen, olardyń 6 myńnan astamy qoljetimdi dep tanylǵan. Bıyldyń ózinde 1 147 nysan beıimdelgen.
Eske salaıyq, buǵan deıin Almatyda qoljetimdi orta talaptaryn saqtamaǵandarǵa 2 mln teńgeden astam aıyppul salynǵanyn jazǵan edik.
