Almatyda endi drondar qoqys tastap, túkirgen turǵyndarǵa eskertý jasaıdy

ALMATY. KAZINFORM — Almatyda quqyq buzýdyń aldyn alý júıesine tsıfrlyq tehnologııalardy engizý jalǵasyp jatyr. Endi drondar tek quqyq buzýshylyqtardy tirkep qana qoımaı, naqty ýaqyt rejıminde turǵyndarǵa zań talaptaryn saqtaý qajet ekenin eskertip otyrady. 

Polıtsııanyń málimetinshe, ushqyshsyz ushý apparattary jaryq dabyl elementterimen jáne profılaktıkalyq habarlamalar taratatyn daýys zoraıtqysh qurylǵylarmen jabdyqtalǵan.

Olar qoǵamdyq keńistikterdi, jaıaý júrginshiler aımaqtaryn, aýlalardy jáne adam kóp shoǵyrlanatyn oryndardy patrýldeıdi.

Qoqys tastaý, qoǵamdyq orynda túkirý, usaq buzaqylyq jasaý nemese joldy belgilenbegen jerden kesip ótý sııaqty quqyq buzý anyqtalǵan jaǵdaıda, azamattarǵa dereý daýystyq eskertý jasalady. Qurylǵylar jazalaýshy emes, aldyn alý quraly retinde jumys isteıdi.

Almaty polıtsııa departamenti ákimshilik polıtsııa basqarmasynyń bastyǵy Serik Shýmaev jobanyń basty maqsaty quqyq buzýshylyqtardy tirkeý emes, olardyń aldyn alý ekenin atap ótti.

— Bizdiń mindetimiz — quqyq buzýshylyqtardy tirkeý ǵana emes, eń aldymen olardyń aldyn alý. Daýys zoraıtqyshpen jabdyqtalǵan drondar quqyq buzýshylyqtarǵa jedel áreket etýge jáne azamattarǵa tártip erejelerin birden eske salýǵa múmkindik beredi. Bul — qoǵamdyq tártip mádenıetin qalyptastyratyn zamanaýı profılaktıkalyq qural, — dedi ol.

Polıtsııa ókilderiniń aıtýynsha, drondar qoljetimdiligi shekteýli aýmaqtardy da qamtýǵa múmkindik beredi. Sonymen qatar qosymsha narıadtar sanyn arttyrmaı-aq baqylaýdy kúsheıtýge jaǵdaı jasaıdy.

Eske salaıyq, buǵan deıin Almaty polıtsııasy qoǵamdyq jáne jol qaýipsizdigin arttyrý, sondaı-aq quqyq buzýshylyqtyń aldyn alý maqsatynda ushqyshsyz ushý apparattary qoldanylyp jatqanyn habarlaǵan edi.