Almatyda endi arnaıy turaqta kólik saqtaý úshin aqy alynady
ALMATY. KAZINFORM — Almatyda ákimshilik quqyq buzýshylyq jasaǵany úshin ustalyp, kommýnaldyq arnaıy turaqqa jetkizilgen kólikterdi evakýatsııalaý jáne saqtaý úshin aqy engiziledi. Jańa tártip 4 qazannan bastap kúshine enedi.
Almaty qalasynyń Jol qozǵalysy jáne jolaýshylar kóligin uıymdastyrý basqarmasynyń málimetinshe, 4 qazannan bastap kólik quraldaryn kommýnaldyq arnaıy turaqtarǵa evakýatsııalaý úshin tólemniń biryńǵaı tártibi qoldanylady. Tólem mólsheri 18 qyrkúıekte Almaty qalasy máslıhatynyń kezekten tys sessııasynda bekitildi.
Evakýatsııa quny kóliktiń barlyq sanaty úshin 3 AEK, ıaǵnı 12 975 teńge bolady. Jeńil avtokólikti arnaıy turaqta saqtaý quny alǵashqy táýlikke 2,5 AEK (10 812,5 teńge), keıingi ár táýlikke 5 AEK (21 625 teńge) mólsherinde belgilendi.
Kólik ıelerine quqyq buzýshylyqtardy joıyp, avtokólikterin 3 qazanǵa deıin arnaıy turaqtan alyp ketý usynylady.
Aıta keteıik, bul ózgeris barlyq evakýatsııa jaǵdaıyna qatysty emes. Ol Ákimshilik quqyq buzýshylyq týraly kodekste kózdelgen jaǵdaıda ustalyp, arnaıy turaqqa jetkizilgen kólik quraldaryna ǵana qoldanylady.
Eske salaıyq, Almatyda avtoturaq tarıfi ózgeretini aıtyldy.
