Almatyda eń tanymal áleýmettik qyzmetter ataldy
ALMATY. KAZINFORM — Halyqty áleýmettik qorǵaý salasyndaǵy retteý jáne baqylaý komıtetiniń Almaty departamenti birinshi toqsandaǵy jumysyn qorytyndylady.
Departament basshysy Murat Muratbekovtyń aıtýynsha, qańtar–naýryz aıynda qalada 29 128 memlekettik qyzmet kórsetilgen. Sonyń ishinde 23 628 qyzmet zeınetaqy men áleýmettik qamtamasyz etý salasyna tıesili bolsa, taǵy 5 500 qyzmet múgedektikti belgileý men áleýmettik qorǵaý sharalaryn ázirleýge qatysty bolǵan.
— Qyzmettiń basym bóligin elektrondyq úkimet portaly men «Azamattarǵa arnalǵan úkimet» memlekettik korporatsııasy arqyly kórsetildi. Bul halyqqa barynsha ashyq ári qoljetimdi bolýdy qamtamasyz etedi, — dedi ol.
Deparament málimeti boıynsha eń kóp suranysqa ıe qyzmetter:
— bala týý men kútimine baılanysty járdemaqy — 6 887 qyzmet (23,6%);
— múgedektikti belgileý — 5 500 (19%);
— bazalyq zeınetaqy tólemi — 4 353 (15%);
— jasyna baılanysty zeınetaqy tólemi — 3 956 (13,6%).
Murat Muratbekov qyzmet kórsetýdiń proaktıvti formatyna erekshe nazar aýdarylyp otyrǵanyn atap ótti. Mysaly, múgedektikke qatysty sheshimniń 48%-y azamattardy aralastyrmaı qashyqtan qabyldanǵan.
Baqylaý men monıtorıng baǵytynda ońaltý quralyna berilgen 31 myń ótinishtiń 47,7%-y oryndalǵan. Odan bólek tizimnen 76 senimsiz jetkizýshi shyǵarylyp, nysandardyń qoljetimdiligi boıynsha 8 jospardan tys tekserý júrgizilgen. Nátıjesinde 39 quqyq buzýshylyq anyqtalyp, 1,8 mln teńge kóleminde aıyppul salynǵan.
Eske salaıyq, Eńbek jáne halyqty áleýmettik qorǵaý mınıstri Asqarbek Ertaev zeınetaqy bıyl bir ret ınflıatsııa deńgeıinde ındekstelgenin, qaıta kóterý múmkin emes ekenin aıtty.
