Almatyda elimizdegi alǵashqy Tsıfrlyq medıtsına ortalyǵy ashyldy
ALMATY. KAZINFORM – Almaty qalasynda Almaty Digital Medical Center – Qazaqstandaǵy tuńǵysh Tsıfrlyq medıtsına ortalyǵynyń ashylý rásimi ótti.
Joba Almaty qalasy Qoǵamdyq densaýlyq saqtaý basqarmasy men Tsıfrlandyrý basqarmasy arasyndaǵy memorandým aıasynda júzege asyryldy. Tsıfrlyq medıtsına ortalyǵynyń dırektory Vasılıı Mıasnıakovtyń aıtýynsha, ortalyq densaýlyq saqtaý júıesiniń ashyqtyǵyn jáne tıimdigin arttyrý maqsatynda quryldy. Munda tsıfrlyq qyzmetter beske bólingen. Olar: aqparattyq-taldaý ortalyǵy, biryńǵaı baılanys ortalyǵy, telemedıtsınalyq patronaj, jasandy ıntellekt negizindegi vırtýaldy daýystyq kómekshiler jáne telemedıtsına qyzmeti.
- Biz bul salada kópten beri jumys istep kelemiz jáne dárigerlerge jedel saraptama, qoldaý quraldarynyń jıi jetispeıtinin baıqadyq. Patsıentterge medıtsınalyq uıymdarmen yńǵaıly baılanys, jedel jaýaptar jetispeıdi. Jalpy qalaǵa densaýlyq saqtaý júıesin ortalyqtandyratyn ortalyq qajet boldy. Sondyqtan Almaty Digital Medical Center quryldy. Ol qazir de, bolashaqta da Almaty qalasynyń turǵyndaryna kóp paıda ákeledi dep úmittenemiz. Onyń ishinde aqparattyq-taldaý ortalyǵy jasandy ıntellekt kómegimen eseptilikti qalyptastyryp, óńirdiń aýqymdy medıtsınalyq deregin óńdeý sapasyn arttyrady. Mamandar densaýlyq kórsetkishterin onlaın rejımde baqylap, taldaıdy jáne derekti Qoǵamdyq densaýlyq saqtaý basqarmasyna joldaıdy, – dedi ol.
Odan bólek Vasılıı Mıasnıakov biryńǵaı baılanys ortalyǵynyń 1312 nómeri qala boıynsha barlyq qońyraýdy qabyldaıtynyn atap ótti. Aıtýynsha, baılanys ortalyǵyna habarlasqan naýqastar dárigerge jyldam jazylyp, suraqtaryna jaýap ala alady. Sonyń arqasynda emhanalardaǵy dárigerler men qyzmetkerler qońyraýǵa alańdamaı, aldyndaǵy patsıentke kóbirek kóńil bóledi.
- Barlyq ótinish jınaqtalyp, júıelenip, mańyzdysyna basymdyq beriledi. Bizdiń qyzmetkerler qajetti keńes beredi. Eger jedel suraq bolsa, olar patsıent tirkelgen emhanadan mobıldi brıgadany shaqyra alady. Bul júıe retke keltirilgen, – dedi ol.
Al telepatronaj aıasynda maman naýqasqa qońyraý shalyp nemese onlaın keńes berip, jaǵdaıyn baqylaıdy. Sondaı-aq dári qabyldaýyn eske salady jáne dárigerge barýdy qadaǵalaıdy. Kúrdeli jaǵdaı boıynsha jedel sheshim qabyldaý úshin telemedıtsınalyq konsılıým ótkizý múmkindigi de qarastyrylǵan. Mundaı tásil kezekti qysqartyp, maýsymdyq aýrýdyń taralý qaýpin azaıtady.
- Bizdiń ortalyqta jasandy ıntellektke negizdelgen daýystyq kómekshi de bar. Ol patsıentti skrınıngke, vaktsınalaýǵa, flıýorografııaǵa avtomatty túrde shaqyrady, qabyldaý ýaqyty týraly eske salady jáne nátıjesin tirkeıdi. Bul servıs medıtsınalyq qyzmetkerlerdi kúndelikti qońyraý shalýdan birshama bosatady. Mysaly, tek flıýorografııaǵa shaqyrylatyn adamdar sany – 545 myń turǵyn. Bul jumysty endi jasandy ıntellekt atqarady, – dep atap ótti dırektor.
Al telemedıtsına bóliminiń basshysy Shyryn Nurahmetova telemedıtsına qyzmetiniń erekshelikterine toqtaldy. Aıtýynsha, bul qyzmet 2020 jyldan beri bar. Ol COVID-19 pandemııasy kezinde qala ákimdigi men Qoǵamdyq densaýlyq saqtaý basqarmasynyń bastamasymen iske qosylǵan.
- Bastapqyda maqsaty – úı jaǵdaıynda koronavırýs juqtyrǵan naýqasty qashyqtan baqylaý edi. Búginde ortalyq táýlik boıy jumys isteıdi. Atap aıtqanda, 1312 nómiri arqyly turǵyndar ótinishin qabyldaıdy, olardy quzyretine qaraı baǵyttaıdy, jalpy medıtsınalyq keńes beredi jáne qaladaǵy medıtsınalyq uıym, dárihana, zerthana jáne jeke ortalyqtar týraly aqparat usynady. Kún saıyn ortalyq mamandary jedel járdem shaqyrtýynan keıin úıde qalǵan shamamen 1500 naýqasqa habarlasyp, jaǵdaıyn tekseredi. Sonymen qatar júkti áıelderge, bosanǵandarǵa jáne balalarǵa monıtorıng júrgizedi, – dedi Shyryn Nurahmetova.
Ortalyqta búgingi kúni barlyǵy 80 qyzmetker jumys isteıdi. Aldaǵy jyldar munda telepatronajdyń jańa baǵyttaryn qosý, barlyq memlekettik medıtsınalyq uıymdy biryńǵaı baılanys ortalyǵyna kóshirý, daýystyq kómekshi qyzmetin damytý jáne jasandy ıntellektke negizdelgen sheshimdi synaqtan ótkizý úshin tsıfrlyq medıtsınalyq hab qurý josparlanǵan.
