Almatyda elimizdegi alǵashqy energetıkalyq Qaldyqtardy kádege jaratý zaýyty salynady
ALMATY.KAZINFORM – Qazaqstan Ekologııa jáne tabıǵı resýrstar mınıstri Erlan Nysanbaev «Junxin Environmental Protection (Almaty)» JShS qytaılyq ınvestorymen «Qazaqstan Respýblıkasynyń Almaty qalasynda qaldyqtardy kádege jaratý negizinde elektr energııasyn óndirý» jobasy boıynsha ınvestıtsııalar týraly kelisimge qol qoıdy. Bul týraly Ekologııa jáne tabıǵı resýrstar mınıstrligi habarlady.
Aıta keteıik, «Hunan Junxin Environmental Protection» –qatty turmystyq qaldyqtardy, sonyń ishinde termııalyq óńdeý, elektr energııasyn óndirý jáne resýrstardy qaıta paıdalaný salasyndaǵy ekologııalyq qaýipsiz sheshimderge mamandanǵan qytaılyq jeke kompanııa.
Ol 2011 jyly qurylǵan. Kompanııa operatsııalyq tıimdilikti ońtaılandyrýǵa jáne qorshaǵan ortaǵa áserdi barynsha azaıtýǵa umtyla otyryp, ozyq tehnologııalar men basqarýshylyq tásilderdi belsendi túrde engizip jatyr.
2024 jyly kompanııa Qytaıda 3,2 mln tonna turmystyq qaldyqtardy qaıta óńdep, 1,473 mlrd kVt saǵ elektr energııasyn óndirdi. Sondaı-aq, kompanııanyń 400-den astam patenti bar (onyń ishinde toksınderdi, fıltrattardy, tamaq óndirisiniń qaldyqtaryn kádege jaratý salasynda).
2024 jyldan bastap kompanııa halyqaralyq qatynastaryn belsendi túrde arttyryp jatyr. Bul rette Ortalyq Azııa elderine, atap aıtqanda Qyrǵyzstanda iske asyrý satysynda 3 jobaǵa erekshe nazar aýdarylyp otyr.
Josparlanǵan zaýyttyń qýaty 60 MVt elektr energııasyn óndirýmen táýligine keminde 1600 tonna qaldyq bolay, al ınvestıtsııalardyń jalpy kólemi keminde 145 mlrd teńge.
Jobany iske asyrý kezinde shyǵaryndylar boıynsha eýropalyq standarttarǵa sáıkes keletin qaldyqtardy energetıkalyq kádege jaratý jónindegi ozyq tehnologııa paıdalanylmaq. Sondaı-aq qorshaǵan ortaǵa emıssııalar monıtorınginiń avtomattandyrylǵan júıesin ornatý kózdelgen.
Qurylys kezeńinde keminde 700 ýaqytsha jumys ornyn jáne jergilikti kadrlardy turaqty oqytyp, QHR-ǵa issaparǵa bar múmkindigimen keminde 120 turaqty jumys ornyn qurý josparlanyp otyr.
Aıta ketý kerek, qaldyqtardy energetıkalyq kádege jaratý Ekologııalyq kodekste qaldyqtardy basqarý salasyn damytýdyń negizgi baǵyttarynyń biri.
Eske salsaq, Vengrııa Qazaqstanda bal óndiretin zaýyt salmaqshy.