Almatyda elge esirtki kirgizbek bolǵan sheteldik 15 jylǵa sottaldy
ALMATY. KAZINFORM – Almaty halyqaralyq áýejaıynda sheteldik azamat jeke zattarynyń arasyna jasyryp, iri kólemde esirtki zattaryn elge kirgizbek bolǵan jerinde ustaldy.
Keden qyzmeti men quqyq qorǵaý organdarynyń jedel áreketiniń arqasynda kontrabandalyq shema der kezinde anyqtalǵan.
Sotta memlekettik aıyptaýshy kúdiktiniń kinásin dáleldeıtin tolyq dáleldemelerdi usynyp, qylmystyń barlyq mán-jaıy rastaldy. Nátıjesinde sot sheteldik azamatty 15 jylǵa bas bostandyǵynan aıyrý týraly úkim shyǵardy.
Úkim zańdy kúshine engen joq.
Kólik prokýratýrasy áýejaılar arqyly esirtki jetkizýge áreket jasaıtyndardyń barlyǵy qatań túrde jaýapqa tartylatynyn atap ótti.
Eske salaıyq, buǵan deıin Almatyda 800-ge jýyq esirtki taratqan Telegram-arna men ınternet-dúken buǵattalǵanyn habarlaǵanbyz.