Almatyda elektrsamokattardy ornalastyrýdyń biryńǵaı erejesi engiziledi
ALMATY. KAZINFORM — Almatyda jol qozǵalysyn uıymdastyrýdyń jańartylǵan erejesi ázirlendi. Qujatta alǵash ret jeke mobıldilik quraldaryn paıdalanýdy keshendi túrde retteý kózdelgen. Jobany máslıhat otyrysynda Jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev tanystyrdy.
Jobaǵa sáıkes, elektrsamokattary, mopedter jáne ózge de jeke mobıldilik quraldaryna arnalǵan turaq oryndaryn ornalastyrýdyń biryńǵaı talaptary belgilenedi. Jalǵa berý qyzmetin kórsetetin operatorlar úshin turaq oryndary shart negizinde kóshede uıymdastyrylady. Bul qala aýmaǵynda kólik quraldaryn retimen ornalastyrýǵa múmkindik bermek. Arnaıy belgilengen turaq aımaqtaryn qala turǵyndary jeke samokattary men basqa da jeke mobıldilik quraldaryn ornalastyrý úshin tegin paıdalana alady.
Odan bólek qujatta kólik quraldaryn evakýatsııalaý jáne arnaıy turaqtarda saqtaý tártibi, sondaı-aq aýlalarda shlagbaýmdar men qorǵanysh qorshaýlaryn ornatýdyń biryńǵaı talaptary aıqyndalǵan.
— Bul rette jedel járdem, órt sóndirý jáne basqa da jedel qyzmet kólikteriniń kedergisiz júrýi mindetti talap retinde saqtalady, — dedi Erjan Dıhanbaev.
Qujat jobasy máslıhat depýtattary arasynda qoldaý tapty.
Eske salaıyq, almatylyqtar elektrsamokat erejesin buzǵandar týraly WhatsApp arqyly habarlaı alatynyn jazǵanbyz.
