Almatyda elektromobıl qýattaıtyn 311 stantsııa ornatylady
ALMATY. KAZINFORM – Almatyda elektromobılderge arnalǵan zarıadtaý stantsııalaryn ornatýǵa 311 jer telimi bólindi.
Árbir ýchaskede konkýrstyq irikteýden ótken otandyq ınvestorlar eki orynǵa eseptelgen qýaty 60 kVt-tan bastalatyn bir EZS ornalastyrady. Barlyq stantsııa paıdalanýǵa berilgennen keıin qalada elektromobılderdi qýattaýǵa arnalǵan 622 jańa stantsııa paıda bolady.
– Zarıadtaý stantsııalary qala turǵyndarynyń jappaı tartylatyn jerlerinde-bazar, saıabaq, dámhana jáne basqa da qoǵamdyq keńistikter aýmaǵynda ornatylady. Barlyq stantsııa osy jyldyń sońyna deıin paıdalanýǵa beriledi. Qazir jeke aýmaqtarda 300-den astam EZS jumys istep tur. Jańa nysandardy eskere otyryp, qala boıynsha zarıadtaý stantsııalarynyń jalpy sany 600-den asady, - dep habarlady ákimdikten.
Bir ýchaskege ınvestordyń eń tómengi salymy – 10 mln teńge. Bul rette halyq úshin akkýmýlıatorlyq batareıany zarıadtaýdyń 1 kVt úshin shekti quny QQS esebimen 100 teńgeden aspaıdy. Ýchaskeler uzartýǵa basym quqyǵy bar ınvestorlarǵa 4 jyl merzimge berildi.
Joba Almatydaǵy ekologııalyq jaǵdaıdy jaqsartý qajettiligine baılanysty, sondaı-aq megapolıstegi elektr kólikteriniń ósip kele jatqan sanyn eskere otyryp iske asyrylyp jatyr.
Ulttyq statıstıka bıýrosynyń derekterine sáıkes, 2025 jyldyń 1 sáýirinde Almatyda 8 385 elektromobıl tirkelgen. Ótken jyldyń sáıkes kezeńimen salystyrǵanda olardyń sany 1,5 ese ósti.
Buǵan deıin Qazaqstanda elektr qozǵaltqyshtary bar 12 120 avtokólik tirkelgeni týraly jazǵanbyz.