Almatyda elektrli samokattyń qatysýymen bolatyn jol apattar sany azaıǵan
ALMATY. KAZINFORM – Almatyda bir jyl ishinde kıksherıngtik elektrli samokattarmen júretinder sany eki ese ósken.
Almaty qalalyq mobıldilik basqarmasynyń málimetinshe, qalada búgingi kúni 17 myń kıksherıngtik (birlesip paıdalaný servısteri) samokat bar. Ótken jyly olarmen 14 mln-nan astam sapar jasalǵan, bul 2022 jylǵy kórsetkishten eki ese kóp. Sondaı-aq, olardyń qatysýymen bolǵan jol apaty sany 2023 jyly 35% - ǵa, ıaǵnı, 41-den 27-ge deıin azaıǵan.
Sonymen qatar, «AlmatyBike» velosıpedti jalǵa alý avtomattandyrylǵan júıesinde 800-ge jýyq velosıped tirkelgen, velosıpedti belsendi túrde jalǵa alatyn 1,8 myńnan astam adam bar, olar bir jyl ishinde 336 myńnan astam sapar jasaǵan.
«Aıta keterligi, bıylǵy jyly Almatyda kóshelerdiń shamamen 20 shaqyrymyna velojol jobalaryn ázirleý josparlanýda. Megapolıste barlyǵy 92 shaqyrymǵa jýyq veloınfraqurylym jabdyqtalǵan. Velojolaqtardyń uzyndyǵy - 25 shaqyrym, al velojoldardyń uzyndyǵy – 67 shaqyrym», - dep habarlady qalalyq ákimdiktiń baspasóz qyzmeti.
Almaty ákimdiginiń jobalyq ofısinde elektrli samokattardy júrgizýshilerge qaýipsizdik erejelerin eske saldy:
1. Tek velosıped joly, velosıped jolaǵymen júrý kerek. Ol bolmaǵan kezde joldyń júris bóliginiń oń jaq shetimen, onyń ishinde marshrýttyq kólik quraldaryna arnalǵan jolaq boıynsha; jaıaý júrginshilerdiń júrýine qaýip tóndirmeı, jyldamdyǵy saǵatyna 6 shaqyrymnan aspaıtyn trotýar nemese jaıaý júrginshi joly boıynsha qozǵalý kerek.
2. Joldyń júris bóliginiń oń jaq shetimen, onyń ishinde on segiz jasqa tolmaǵandarǵa, samokat júrgizýshilerge arnalǵan jolaqpen júrýge; kez kelgen sanattaǵy kólik quralyn basqarý quqyǵyna júrgizýshi kýáliginsiz nemese júrgizýshi kýáliginiń ornyna berilgen ýaqytsha kýáliksiz júrýge jol berilmeıdi.
3. Elektr moped, elektr samokat pen velosıpedterdiń júrgizýshilerine: róldi kem degende bir qolmen ustamaı júrýge; jolaýshylardy tasymaldaýǵa arnalǵan arnaıy qurylǵylary bar velosıpedter men mopedtermen tasymaldaýdan basqa jolaýshylardy tasymaldaýǵa; arnaıy qurylǵylary bar velosıpedter men mopedtermen júkti, sondaı-aq arnaıy qurylǵylary bar júkti tasymaldaýdan basqa júkti tasymaldaýǵa tyıym salynady, gabarıtterdiń uzyndyǵy nemese eni boıynsha 50 santımetrge; osy baǵytta júrý úshin tramvaı qozǵalysy bar joldarda jáne bir jolaqtan artyq joldarda solǵa qaraı burylýǵa; kólik quralynda júre otyryp, jaıaý júrginshiler ótkelderi boıynsha joldyń júris bóligin kesip ótýge; qarańǵy ýaqytta joldyń júris bóligi boıynsha basqa kólik quraldarynyń júrgizýshilerine kórinýdi qamtamasyz etetin jol erejesiniń talaptaryna sáıkes keletin jaryq shaǵylystyratyn zatsyz júrýge; joldyń júris bóliginde basqarý kezinde túımelengen shlemsiz bolýy tıis.
«Buzýshylyqtarǵa jol berý kezinde jaýapkershilik kózdelgen: jolaýshylar men júkterdi tasymaldaǵany úshin (QR ÁQBtK 593-baby, 5 AEK aıyppuly), sondaı-aq jol qozǵalysyna qatysýshylarǵa qoıylatyn ózge de talaptardy buzǵany úshin (QR ÁQBtK 620-baby) eskertý nemese aıyppul (3 AEK) kózdelgen», - dep eskertti ákimdikte.
