Almatyda elektr jelilerin jóndeýge baılanysty Tsentralnaıa kóshesi ýaqytsha jabylady

«Alataý Jaryq Kompanııasy» málimdeýinshe, jóndeý jumystary Tsentralnaıa kóshesi, 36 mekenjaıynda, avtomobıl jolynyń astynda júrgiziledi. Osyǵan baılanysty K. Salyqov kóshesinen Jáńgir han kóshesine deıingi aralyqta kólik qozǵalysy ýaqytsha shekteledi.

Jóndeý jumystary №2363 kerneýi 220 kV elektr berý jelisiniń kabeldik bóliginiń zaqymdanýyna baılanysty júrgizilmek.

№2353 jáne №2363 kerneýi 220 kV kabeldik-áýe elektr berý jelileri Almaty qalasyn aınala qorshap turǵan 220 kV saqınaly elektr jelisiniń quramyna kiredi. Atalǵan jeliler «Ermensaı» №160A jáne «Besaǵash» №166A qosalqy stantsııalarynyń arasynda ornalasqan.

- Jelilerdiń biriniń zaqymdanýy saqınaly jeliniń ajyraýyna, elektr qýaty aǵyndarynyń qaıta bólinýine jáne energııa júıesiniń qalǵan elementterine túsetin júktemeniń artýyna ákeledi. Qazir jeli májbúrli túrde ajyratylǵan syzba boıynsha jumys istep tur, - delingen habarlamada.

Jaryqpen jabdyqtaýdyń qalypty rejımin qalpyna keltirip, aqaýdyń odan ári baqylaýdan shyǵýyna jol bermeý úshin zaqymdanǵan ýchaskeni qysqa merzimde jóndep, jeliniń tutastyǵyn qalpyna keltirý qajet.

- Zaqymdanǵan kabel joldyń astynda ornalasqandyqtan, jóndeý jumystaryn júrgizý úshin jol jabyny men beton naýany ashý qajet. Bul mamandarǵa kabelge qol jetkizip, zaqymdanǵan jeri men sıpatyn naqty anyqtaýǵa, kabeldi nemese kabel mýftasyn jóndeýge jáne jelini qaıta iske qospas buryn qajetti synaqtardy júrgizýge múmkindik beredi, - dedi «Alataý Jaryq Kompanııasy».

Jóndeý jumystary aıaqtalǵannan keıin jol jabyny tolyq qalpyna keltiriledi.

Kólik qozǵalysyna engiziletin ýaqytsha shekteý tek apattyq-qalpyna keltirý jumystaryn júrgizýge baılanysty.

Eske salsaq, Almatyda Kókjaılaýǵa deıin jol salý úshin taǵy jer telimderi alynatyny habarlandy.