Almatyda elektr uıashyǵynyń zaqymdanýynan jaryq óshti
ALMATY. KAZINFORM - Almatynyń bir bóliginde ınfraqurylymdaǵy aqaýlarǵa baılanysty jaryq óshti.
20 tamyzda qalanyń keı aýmaqtarynda elektr energııasy berý toqtap qaldy. «Alataý Jaryq Kompanııasy» AQ ınteraktıvti kartasynyń málimetinshe, Almaly aýdanynda saǵat 16:20-da Túrkebaev, Rozybakıev, Bógenbaı batyr kósheleri men Raıymbek dańǵylynyń aralyǵynda elektr toǵy ajyraǵan.
– Bul jaǵdaıǵa energııany úlestirý pýnktinde eki uıashyqtyń zaqymdanýy sebep boldy. «Alataý Jaryq Kompanııasy» AQ mamandary shuǵyl túrde jumysqa kiristi. Qazirgi ýaqytta elektr qýatyn tolyq qalpyna keltirý úshin qajetti tehnıkalyq sharalar júrgizilip jatyr, – dep habarlady «AJK» ókilderi.
Taǵy bir apattyq óshý saǵat 18:10-da Seıfýllın, Jumabaev, Selskaıa jáne K.Bespakov kósheleriniń mańynda boldy. «Alataý Jaryq Kompanııasy» ınteraktıvti kartasynyń málimetinshe, elektr qýatyn qalpyna keltirýge shamamen úsh saǵat ýaqyt ketedi.
Eske salaıyq, 14 tamyzda Almaty men Almaty oblysynyń basym bóliginde jaryq óshti.
Energetıka mınıstrligi Qazaqstannyń keı óńirlerindegi elektrdiń ajyratylýyna túsinikteme berdi.
