Almatyda elektr samokattary men mopedterdi paıdalaný tártibi ózgeredi
ASTANA. KAZINFORM – Almatyda jol qozǵalysyn uıymdastyrýdyń jańartylǵan jobasy ázirlenip, onda elektr samokattary, mopedter jáne ózge de jeke mobıldilik quraldaryn paıdalanýdyń biryńǵaı tártibi kózdelgen.
Jobaǵa sáıkes, elektr samokattary, mopedter jáne basqa da jeke mobıldilik quraldaryna arnalǵan turaq oryndaryn ornalastyrýdyń biryńǵaı qaǵıdalary engiziledi.
– Jalǵa berý qyzmetin kórsetetin operatorlar úshin turaq oryndary shart negizinde uıymdastyrylady. Sonymen qatar turǵyndar bul turaqtardy ózderiniń jeke samokaty men basqa da jeke kólik quraldaryn qoıý úshin tegin paıdalana alady, – delingen ákimdik habarlamasynda.
Qujatta sondaı-aq jeke mobıldilik quraldaryn evakýatsııalaý jáne saqtaý tártibi, aýlalarda shlagbaýmdar men qorǵanysh qorshaýlaryn ornatý qaǵıdalary aıqyndalǵan.
– Bul rette jedel járdem, órt sóndirý jáne basqa da jedel qyzmetterdiń kedergisiz ótýi mindetti túrde qamtamasyz etiledi. Jańartylǵan qaǵıdalardy engizý jeke kólik quraldaryn ornalastyrýdy júıelep, jol qozǵalysy qaýipsizdigin arttyrýǵa múmkindik beredi, – dep málimdedi ákimdik.
Aıta keteıik, elektrosamokatty qalaı qaýipsiz paıdalanýǵa bolatynyn mynaý silteme arqyly bile alasyz.
