Almatyda elektr samokattarǵa shekteý qoıylýy múmkin: másele máslıhatta talqylandy

ALMATY. KAZINFORM – Almatyda elektr samokattardy paıdalaný máselelerin talqylaýdyń jalǵasy retinde jumys tobynyń alǵashqy otyrysy ótti.

Almaty máslıhatynyń málimetinshe, negizgi bastamalardyń qatarynda:

- «Sergek» júıesi úlgisinde quqyqbuzýshylyqtardy tirkeý kameralaryn ornatý;
- samokattar sanyna shekteý qoıý jáne biryńǵaı turaqtar jelisin qurý;
- paıdalanýshylardyń jaýapkershiligin mindetteý;
- úlkeıtilgen nómirlerdi engizý jáne biryńǵaı tehnıkalyq standarttardy bekitý usynystary bar.

Sonymen qatar mektepter, balabaqshalar, medıtsına mekemeleri jáne ózge de áleýmettik nysandar mańynda, sondaı-aq jaıaý júrginshi kóp júretin kóshelerde jyldamdyqty shekteý, jańa jol jobalaryna velojolaqtardy qosý usynyldy.

- Jeke túrde samokatpen saıabaqtarda, skverlerde jáne trotýarlarda júrýge tyıym salý, olardy paıdalaný erejelerin jergilikti atqarýshy organdardyń bekitýi máseleleri talqylandy. Usynystar sheshim qabyldaý úshin memlekettik organdarmen, sherıng operatorlarymen jáne qoǵam ókilderimen birlesip pysyqtalatyn bolady, - dep habarlady máslıhattan.

Eske salaıyq, Almatyda samokat mingen eki qyzdy avtobýs qaǵyp ketkenin jazǵanbyz.

Oǵan deıin Almatyda samokat aıdaǵan jasóspirimder náreste arbasyn qaǵyp ketti.