Almatyda elektr samokattan qulaǵan er adam mert boldy
ALMATY. KAZINFORM – Almatyda túngi ýaqytta samokat aıdaǵan er adam odan qulap qaza tapty.
Almaty qalasy polıtsııa departamentiniń málimetinshe, túngi ýaqytta samokatpen júrgen 44 jastaǵy er adam jol jıegindegi jıektasqa soǵylyp, qulap túsken. Oqıǵa Varlamov kóshesinde, Tóle bı dańǵylyna jaqyn mańda bolǵan.
- Aldyn ala málimet boıynsha er adam elektr samokatty basqara almaı qalyp, jıektasqa soǵylǵan. Sonyń saldarynan ol aýyr jaraqat aldy. Oqıǵa ornyna jedel járdem qyzmetkerleri dereý jetip, er adamǵa medıtsınalyq kómek kórsetti. Dárigerler birneshe mınýt boıy onyń ómirin saqtap qalýǵa tyrysqanymen, alǵan jaraqattaryna er adam kóz jumdy, - dep habarlady departamentten.
Polıtsııa marqum samokatpen júrgen kezde jeke qorǵanys quraldaryn paıdalanbaǵanyn atap ótti. Qazir oqıǵanyń barlyq mán-jaıy anyqtalyp jatyr.
Tártip saqshylary samokat júrgizýshileri úshin qaýipsizdik talaptaryn saqtaýdyń mańyzyn eske salady.
Bıyl 25 tamyzda Qazaqstanda elektrosamokatpen trotýarlar men jaıaý júrginshiler jolynda júrýge tyıym salyndy.
