Almatyda eks-polıtseı áıelin qatygezdikpen óltirgen: marqumnyń týystary qatań jaza suraıdy
ALMATY. KAZINFORM — Almatyda azamattyq nekedegi áıelin asqan qatygezdikpen óltirdi dep aıyptalǵan burynǵy polıtsııa qyzmetkerine qatysty sot protsesi júrip jatyr.
Sarapshylar qaıǵyly oqıǵa kezinde aıyptalýshynyń «affekt» jaǵdaıynda bolǵany týraly qorytyndy shyǵarǵan. Alaıda qaza tapqan áıeldiń týystary bul sheshimmen múldem kelispeıdi.
Qaıǵyly oqıǵa 2025 jyldyń mamyr aıynda Naýryzbaı aýdanyndaǵy turǵyn úı keshenderiniń birinde bolǵan. Kúdikti buryn Almaty oblystyq polıtsııa departamentinde qyzmet atqarǵan.
Qazir sottalýshyǵa QR Qylmystyq kodeksiniń 99-baby, 2-bóligi, 5-tarmaǵy («Asa qatygezdikpen jasalǵan adam óltirý») boıynsha aıyp taǵylyp otyr. Jábirlenýshi taraptyń qorǵaýshysy Meıirman Shekeevtiń aıtýynsha, marqumnyń otbasy aıyptalýshynyń qylmys kezinde esi aýysqany nemese affekt jaǵdaıynda bolǵany týraly saraptama nátıjesimen kelispeıdi.
— Biz bul sheshimmen kelispeımiz. Saraptama eki ret júrgizildi. Qazir sarapshylardy kóptegen suraqqa jaýap alý úshin sotqa shaqyryp jatyrmyz. Jaýap alý qorytyndysy boıynsha qaıta saraptama taǵaıyndaý týraly ótinish bildirýimiz múmkin. Bári olardyń beretin túsiniktemesine baılanysty. Kúmándi tustar óte kóp. Polıtsııa qyzmetkeri qalaısha affekt jaǵdaıyna túsýi múmkin? Ol organda 15 jyl qyzmet etken, kapıtan sheninde bolǵan, kún saıyn san túrli tekseristen ótken adam. Ol ádeıi sımýlıatsııa jasaǵan bolýy múmkin, — dedi Meıirman Shekeev.
Advokattyń sózinshe, tergeý jumystary obektıvti júrgizilgen, tek affekt jaǵdaıy týraly qorytyndyǵa jábirlenýshi taraptyń úlken kúmáni bar.
Sondaı-aq Meıirman Shekeev affekt jaǵdaıy rastalsa, is QR Qylmystyq Kodeksiniń 101-babyna («Affekt jaǵdaıynda adam óltirý») aýystyrylýy múmkin ekenin eskertti. Bul bap boıynsha eń joǵary jaza — 5 jylǵa deıin bas bostandyǵynan aıyrý. Tergeý ızolıatorynda otyrǵan ýaqytyn esepke alǵanda, sottalýshy bostandyqqa áldeqaıda erte shyǵyp ketýi múmkin.
— Sot sheshimi tek sarapshylardyń qorytyndysyna ǵana súıenbeıdi. Sot barlyq dáleldeme jıyntyǵyn baǵalap, ishki senimine súıene otyryp sheshim qabyldaıdy, — dep tolyqtyrdy ol.
Marqumnyń otbasy ádil úkim bolady dep úmittenedi. Qaza tapqan áıeldiń sińlisi Razııa Shynybek te «affekt» nusqasyna qarsy shyǵyp, sottalýshyǵa qatań jaza taǵaıyndaýdy talap etti.
Onyń aıtýynsha, erli-zaıyptylar azamattyq nekede turǵan jáne úsh bala tárbıelep otyrǵan. Qazir balalar 16, 14 jáne 4 jasta. Qaıǵyly oqıǵadan keıin balalar Razııanyń qamqorlyǵynda qalǵan. Ol balalardyń psıhologııalyq jaǵdaıy áli de óte aýyr ekenin jasyrmady.
— Qylmys bolǵan sátte men ol jerde bolǵan joqpyn. Kelgenimde úıge kirgizbedi, sondyqtan naqty ne bolǵanyn aıta almaımyn. Biraq úıde bolǵan tórt jasar bala: «Ákem anamdy pyshaqtap tastady», «Ákem — zombı», «Ákem jaman» dep aıtýdan tyıylmady. Ol únemi aǵasynan: «Kóke, sen de men sııaqty anamdy saǵynasyń ba?» dep suraıdy. Muny estý óte aýyr, — dedi Razııa.
Sonymen qatar Razııa qaıǵyly oqıǵadan sál buryn ápkesiniń azamattyq kúıeýimen ajyrasýǵa nıetti bolǵanyn jetkizdi. Oǵan er adamnyń ishimdikke salynýy sebep bolǵan kórinedi.
— Ol kúıeýiniń kóp ishetinin, birneshe kúndep úı kórmeı ketetinin aıtyp shaǵymdanatyn. Ajyrasýdy oılap, bir aıdaı bólek turdy. Keıin ol qaıta kelgen, biraq ápkem ony qabyldaı almady. Oqıǵanyń naqty qandaı jaǵdaıda bolǵanyn bilmeımin, — dedi ol.
Eske salaıyq, Astanada burynǵy áıelin birneshe jyl qýdalaǵan stalker jaýapqa tartyldy.
