Almatyda ekologııalyq zań buzǵan kásiporyndarǵa 34 mln teńgege jýyq aıyppul salyndy
ALMATY. KAZINFORM — 2026 jyldyń birinshi jartyjyldyǵynda Almatyda ekologııalyq zańnamany buzǵan kásiporyndar men ózge de tabıǵat paıdalanýshylarǵa jalpy somasy shamamen 34 mln teńge kóleminde ákimshilik aıyppul salyndy. Onyń 19,5 mln teńgeden astamy óndirilgen.
Bul týraly Óńirlik kommýnıkatsııalar qyzmetiniń alańynda ótken baspasóz máslıhatynda Almaty boıynsha ekologııa departamentiniń basshysy Dinmuhamed Lesbekov málimdedi.
Onyń aıtýynsha, esepti kezeńde memlekettik ekologııalyq ınspektorlar 125 tekserý júrgizgen. Nátıjesinde ekologııalyq zańnamanyń 58 buzýshylyǵy anyqtalyp, olardy joıý jóninde 28 nusqama berildi. Sondaı-aq ákimshilik quqyq buzýshylyqtar boıynsha 165 hattama toltyrylyp, olardyń negizinde 162 ákimshilik aıyppul salynǵan.
— Departamenttiń negizgi mindeti — quqyq buzýshylardy jaýapkershilikke tartý ǵana emes, sonymen qatar ekologııalyq quqyq buzýshylyqtardyń aldyn alý. Memlekettik ekologııalyq baqylaý zań buzýshylyqtardy der kezinde anyqtap, tabıǵat qorǵaý zańnamasy talaptarynyń saqtalýyn qamtamasyz etýge múmkindik beredi, — dedi Dinmuhamed Lesbekov.
Sonymen qatar jekelegen zań buzýshylyqtar boıynsha sot sheshimimen qosymsha aıyppuldar taǵaıyndalyp, bir kásiporynnyń qyzmeti alty aı merzimge toqtatyldy.
Baspasóz máslıhatynda zańsyz qoqys úıindilerin joıý jumystary da sóz boldy. Alty aı ishinde jedel shtab 13 zańsyz qoqys úıindisin anyqtap, onyń tórteýi joıylǵan. Qalǵan nysandar boıynsha tıisti sharalar qabyldaý úshin aqparat aýdan ákimdikterine joldanǵan.
Eske salaıyq, buǵan deıin Esentaı ózeninen munaı ónimderiniń artyq mólsheri anyqtalǵanyn habarlaǵanbyz.
