Almatyda ekologııalyq talaptardy buzǵan zaýytqa aıyppul salynyp, jumysy toqtatyldy
ALMATY. KAZINFORM – Almaty qalasynyń ekologııa departamenti 2025 jyldyń 6 aıynyń qorytyndysyn jarııalady.
Ekologııa departamenti basshysynyń orynbasary Dinmuhamed Lesbekovtyń aıtýynsha, jarty jyl ishinde memlekettik ınspektorlar 49 tekserý júrgizgen jáne onyń 16-sy jospardan tys tekserý bolǵan. Onyń negizinde 28 ákimshilik quqyq buzýshylyq týraly hattama toltyrylyp, 23 aıyppul salyndy.
– Onyń ishinde berilgen nusqamalardy oryndamaǵan 4 kásiporynǵa qatysty ÁQBtK 462-babynyń 3-bóligi boıynsha hattamalar toltyryldy. Іs materıaldary sotqa joldanyp, kásiporyndarǵa jalpy somasy 2,5 mln teńgeden asatyn aıyppul salyndy, - dedi Dinmuhamed Lesbekov.
Sondaı-aq departament ókili ÁQBtK-niń 328-babynyń 4-bóligi boıynsha qaladaǵy beton zaýytqa qatysty sottyń qaýlysymen 2 mln teńge aıyppul salynyp, zańbuzýshylyqtar tolyq joıylǵanǵa deıin qyzmeti ýaqytsha toqtatylǵanyn atap ótti.
Eske salaıyq, buǵan deıin Qarǵaly ózeni jasyl túske enýine baılanysty zertteý nátıjesi jarııalandy.