Almatyda ekologııalyq shekteýleri bar aımaq belgilendi
ALMATY. KAZINFORM — Almatyda qalalyq máslıhattyń kezekten tys XL sessııasy ótti. Sessııa barysynda Almaty ákiminiń orynbasary Almashan Smatlaev atmosferalyq aýany qorǵaý qaǵıdalaryn bekitý jobasy tanystyrdy.
— Almaty qalasyndaǵy atmosferalyq aýanyń sapasy eń ózekti ekologııalyq máselelerdiń biri bolyp qala beredi. Atalǵan qujat — Almaty qalasynyń erekshelikterin eskere otyryp, aýa sapasyna áser etetin negizgi lastaý kózderin júıeli túrde retteýge arnalǵan qural. Alǵash ret kólik, III sanattaǵy obektiler, tómen shyǵaryndylar aımaǵy (LEZ) jáne ekologııalyq monıtorıng talaptaryn bir quqyqtyq mehanızmge biriktiredi, — dedi ol.
Qaǵıdalar 4 negizgi baǵytty qamtıdy:
1. Kólikti paıdalaný erejelerin retteý;
2. III sanattaǵy obektilerge qoıylatyn ekologııalyq talaptar;
3. Tómen shyǵaryndylar aımaǵyn (LEZ) uıymdastyrý;
4. Monıtorıng, tsıfrlandyrý jáne qolaısyz meteojaǵdaılar (QMJ) kezinde áreket etý;
Almashan Smatlaev megapolıste shyǵaryndylardy azaıtý úshin tómen shyǵaryndy aımaq (LEZ) kezeń-kezeńimen engize otyryp, aýmaqty birtindep keńeıtý josparlanǵanyn atap ótti.
Tómen shyǵaryndy aımaǵy retinde birinshi kezeńde Bógenbaı batyr, Dostyq, Abaı, Jeltoqsan kósheleriniń aımaǵy belgilendi.
Ekinshi kezeńde: Ál-Farabı, Saın, Rysqulov, Shyǵys avtomobıl aınalma joly aımaǵy, al úshinshi kezeńde qala shekarasynda bolady.
Tómen shyǵaryndy aımaqta engiziletin talaptar:
− gazben qamtylǵan aýdandarda qatty jáne suıyq otyndy paıdalanýǵa tyıym;
− qaldyqtardy jaǵýǵa jáne pırotehnıkany qoldanýǵa tyıym;
− generatorlar men arnaıy tehnıkada tazalaý júıelerin mindetti túrde qoldaný;
— Tómen shyǵaryndy aımaqta tek ekologııalyq talaptarǵa saı jáne shyǵaryndylardy tekserýden ótken kólikter ǵana qozǵala alady. Maqsat — jańa tyıymdar engizý emes, eń lastaýshy kólikterdi joldan alyp tastaý. Shyǵaryndylar naqty ólshenedi, derekter avtomatty túrde tirkeledi jáne qolmen ózgertilmeıdi, — dedi ol.
Depýtattar suraǵyna jaýap bergen Almaty ákiminiń orynbasary shekteý engizilgen aımaqta eski kólikterdiń kirýi ázirge aqyly bolmaıtynyn aıtty.
— LEZ pılottyq rejımde jumys isteıdi. 2026 jyly shekteý úshin aqy alynbaıdy. Pılottyq joba nátıjesi boıynsha ony aldaǵy ýaqytta damyta beremiz. Nıý-Iork, London, Shanhaı, Beıjińde — mundaı shekteýler bar. Biraq aqyly bolý úshin balama jol usynýymyz kerek. Adamdar qoǵamdyq kólikke otyra alatyndaı jańa metro jelileri júrgiziledi, avtobýs marshrýttary bolady. Bizde 800 myń kólik tirkelgen, oblystan 400 myń kiredi. Álemdik tájirıbe boıynsha adamdardyń 70 paıyzy qoǵamdyq kólikte, 30 paıyzy jeke kólikpen júredi. Almatyda 60 paıyz jeke kólikti, 40 paıyz qoǵamdyq kólikti qoldanady, — dedi ol.
Eske salaıyq, buǵan deıin Almatyda eski kólikterdiń ortalyqqa kirýine shekteý qoıylatynyn jazǵanbyz.