Almatyda ekologııalyq ruqsatsyz jumys isteıtin monshalar nazarǵa alyndy

ASTANA. KAZINFORM — Almatyda monsha jáne saýna ıelerimen profılaktıkalyq jumys kúsheıtildi, dep habarlaıdy qala ákimdiginiń baspasóz qyzmeti.

Qatty otyn paıdalanatyn monshalar men saýnalar atmosferalyq aýanyń lastaný kózine aınalýy múmkin. Osyǵan baılanysty Almaty qalasynyń atmosferalyq aýa sapasyn jaqsartý jónindegi is-sharalar jospary aıasynda «Eco Almaty» JShS qyzmetkerleri atalǵan nysandardy josparly profılaktıkalyq maqsatta aralady. Bul týraly megapolıstiń Ekologııa jáne qorshaǵan orta basqarmasynyń ókilderi aıtty.

Almatyda shamamen 400-ge jýyq monsha men saýna bar. Alaıda olardyń bir bóligi mindetti ekologııalyq tekserýden ótpeı, ıaǵnı tıisti ekologııalyq ruqsattarsyz jumys istep keledi.

Profılaktıkalyq is-sharalar barysynda «Eco Almaty» mamandary nysan ıelerine ekologııalyq zańnama talaptaryn, ekologııalyq tekserýden ótýdiń mańyzyn, shyǵaryndylardy esepke alý qaǵıdalaryn jáne qorshaǵan ortaǵa áserdi azaıtý joldaryn túsindiredi.

— Mundaı jumystyń negizgi maqsaty — zańbuzýshylyqtardyń aldyn alý, ekologııalyq táýekelderdi tómendetý jáne qala aýasynyń jaı-kúıine jaýapty kózqaras qalyptastyrý. Profılaktıka yqtımal máselelerdi aldyn ala anyqtaýǵa múmkindik berip, Almatydaǵy ekologııalyq ahýaldy jaqsartýǵa yqpal etedi, — delingen ákimdik taratqan aqparatta.

Budan buryn Almatyda pırotehnıkanyń zańsyz satylymy tekserilip jatqany habarlandy.