Almatyda ekologııalyq normalardy buzǵan júrgizýshiler 653 mln teńge aıyppul tóledi
ALMATY. KAZINFORM — Almatyda ekologııalyq qyzmet mamandary polıtsııa departamentimen birlesip jolda reıd júrgizip jatyr.
Almaty ákimdiginiń málimetinshe, «Eco Almaty» JShS-niń jyljymaly zerthanalary kólik quraldarynyń shyǵaryndylar deńgeıin jolda ólsheıdi.
— Bıyl Eco Almaty jáne «Renessans plıýs» kompanııasynyń qyzmetkerleri 186 myńnan astam ólshem júrgizip, 20 myńǵa jýyq hattama jasady. Salynǵan aıyppuldardyń jalpy somasy 653 mln teńgeden asty, — dep habarlady ákimdikten.
Sondaı-aq jospar aıasynda qatty otyndy qoldanatyn qoǵamdyq tamaqtaný oryndary — káýaphanalar men monshalardy anyqtaý boıynsha jumystar da qolǵa alynǵan.
Eske salaıyq, Almatyda «Almaty qalasynyń aýmaǵynda atmosferalyq aýany qorǵaý salasyndaǵy arnaıy ekologııalyq talaptardy engizý týraly» jańa erejeler jobasy ázirlengen. Qujat qazir kelisý rásiminen ótip jatyr.
— Erejeler qabyldanǵannan keıingi nátıje jan-jaqty bolmaq. Negizgi lastaýshy retinde avtopark basty ekologııalyq baqylaýǵa alynady. Buryn retteýge shamaly tartylǵan III sanattaǵy kásiporyndar da jańa talaptarǵa baǵynady: olar ekologııalyq normalardy saqtaýǵa jáne tekserýden ótýge mindetti. Sonymen qatar aýa sapasyn jedel baqylaýǵa múmkindik beretin biryńǵaı monıtorıng júıesi qurylyp, turǵyndarǵa ashyq derekter usynylady. Qalada LEZ aımaqtar paıda bolady. Bul kólik qozǵalysyna ekologııalyq talaptar engiziletin aýmaqtar, olardyń maqsaty — aýa lastanýyn azaıtý jáne qalalyq ortany jaqsartý, — dep habarlady ákimdikten.
Eske sala ketsek, Almatyda aýa sapasy birneshe kúnnen beri nasharlap tur.