Almatyda EKO baǵdarlamasy arqyly 5 jylda 13 myń sábı dúnıege keldi

ALMATY. KAZINFORM — Sońǵy 5 jyl ishinde Almaty qalasynda ekstrakorporaldyq uryqtandyrýdyń (EKO) arqasynda 13 myńnan astam bala, onyń ishinde 5 myń sábı MÁMS esebinen sábı dúnıege keldi. 

Almaty qalalyq Medıtsınalyq saqtandyrý qory fılıalynyń málimetinshe, 2025 jyly EKO baǵdarlamasyna 2,2 mlrd teńge bólingen. Bul qarajat protsedýrany MÁMS júıesi arqyly tegin ótýge múmkindik beredi.

— EKO — bedeýlikpen kúrestiń múmkindigi Ekstrakorporaldyq uryqtandyrý — bedeýlikke qarsy eń tıimdi ádisterdiń biri. Qazirgi zamanǵy reprodýktıvti tehnologııalar tabıǵı jolmen bala súıý múmkin bolmaıtyn jaǵdaılarda da ata-ana bolýǵa kómektesedi, — dep túsindirdi MÁMS mamandary.

EKO-ǵa MÁMS arqyly qalaı túsýge bolady

1. Tirkelgen emhanaǵa júginý.

2. Tekseristen ótip, «bedeýlik» dıagnozyn rastaý.

3. Dıagnoz qoıylǵannan keıin 12 aı ishinde dáriger qujattardy joǵary tehnologııalyq medıtsınalyq qyzmetter (JTMQ) jónindegi komıssııaǵa joldaıdy.

4. Komıssııa oń sheshim qabyldaǵan jaǵdaıda patsıent EKO-ǵa joldama alyp, protsedýrany júrgizetin klınıkany ózi tańdaıdy.

EKO-ǵa kimder úmitker bola alady

EKO protsedýrasyna Qazaqstan azamattary myna talaptarǵa saı kelgen jaǵdaıda qatysa alady:

• reprodýktıvti jasta bolýy (AMG 1 ng/ml jáne odan joǵary),

• somatıkalyq jáne endokrındik statýsy qalypty bolýy,

• ovarıaldyq rezerv qanaǵattanarlyq bolýy.

— EKO rásimi resmı nekede turǵan erli-zaıyptylarǵa da, nekesin tirkemegen juptarǵa da qoljetimdi. Basty shart — eki taraptyń jazbasha kelisimi bolýy, — dep habarlady Almaty qalasy boıynsha MÁMS fılıalynan.

Eske salaıyq, buǵan deıin MÁMS júıesimen qosymsha 1 mln-nan astam adam qamtylatynyn jazǵanbyz.