Almatyda eki jasar bala 31 magnıt jutyp qoıǵan
ALMATY. KAZINFORM – Balalarǵa shuǵyl medıtsınalyq kómek kórsetý ortalyǵynda 31 magnıt jutyp qoıǵan sábıge shuǵyl ota jasaldy.
Qalalyq qoǵamdyq densaýlyq saqtaý basqarmasynyń habarlaýynsha, qabyldaý bólimine 1 jas 9 aılyq bala óte aýyr jaǵdaıda jetkizilgen. Tekserý nátıjesinde dárigerler «ishektegi bógde zattar – 31 magnıt, jińishke ishektiń kóptik tesilýi, jaıylǵan nájistik perıtonıt» dıagnozyn qoıdy.
– Balanyń ómirin saqtap qalýdyń jalǵyz joly – shuǵyl hırýrgııalyq ota jasaý boldy. Dárigerler ortańǵy laparotomııa jasap, qursaq qýysy aǵzalaryna tolyq tekserý júrgizdi. Ota barysynda magnıtter ishekten alynyp, jińishke ishektegi kóptegen tesik tigildi, qursaq qýysy tazartylyp, drenaj ornatyldy. Sonymen qatar ishekke transanaldyq ıntýbatsııa jasaldy, - delingen habarlamada.
Ortalyq hırýrgi Asqar Rızvanovtyń aıtýynsha, magnıtterdiń basty qaýpi – olardyń aǵzaǵa bólek-bólek túskenimen, ishekte bir-birine tartylyp, ishek qabyrǵasyn qysyp qalýynda.
– Magnıtterdiń arasynda ishek qabyrǵasy qysylady, qan aınalymy buzylady, tinder jansyzdanady, tesik paıda bolady. Sonyń saldarynan sanaýly saǵattardyń ishinde perıtonıt damýy múmkin. Ata-analar kóbine balanyń jaǵdaıy qanshalyqty jyldam nasharlaıtynyn ańǵarmaı qalady, - dedi hırýrg.
Dárigerlerdiń eskertýinshe, tipti bir magnıt jutylǵan jaǵdaıda da dereý medıtsınalyq kómekke júginýi qajet. Al birneshe magnıt balanyń ómirine aıtarlyqtaı qaýip tóndiredi.
Mamandar ata-analardy balalardyń magnıtti oıynshyqtarǵa, magnıt sharıkterge jáne quramynda usaq magnıtteri bar zattarǵa qol jetkizýin shekteýge, turmysta qaýipsizdik sharalaryn qatań saqtaýǵa úndedi.
Eske salaıyq, buǵan deıin Ulytaý oblysynyń kópbeıindi aýrýhanasynda bronhynan bógde zat anyqtalǵan eki jasar balaǵa ota jasalǵanyn jazǵanbyz.