Almatyda eki qurylys kompanııasy lıtsenzııasynan aıyryldy

ALMATY. KAZINFORM – Almatyda qurylys sapasyn arttyrý jáne turǵyndardyń quqyǵyn qorǵaý maqsatynda baqylaý kúsheıtildi, nátıjesinde bıyl eki qurylys kompanııasy lıtsenzııasynan aıyryldy.

Bul týraly Almaty ákiminiń orynbasary Beıbit Shahanov aıtty.

Onyń sózinshe, ákimdiktiń basty mindeti – qurylys salasynda tártip ornatyp, zańbuzýshylyqtarǵa jol bermeý. Ásirese úlestik qatysý arqyly turǵyn úı salý baǵyty erekshe baqylaýda.

– Qurylystyń sapasy, merzimi jáne kelisimshart talaptarynyń oryndalýy qatań baqylanady. Eger zań buzylsa, eskertý jasaımyz, aıyppul salamyz nemese qajet bolsa, jumysty toqtatamyz, - dedi Beıbit Shahanov Óńirlik kommýnıkatsııalar qyzmetinde ótken brıfıngte.

Onyń sózinshe, bıyl «SK 7 Stroı» JShS jáne «AsiaMax» JShS lıtsenzııasynan aıyryldy. «SK MEGARON» JShS boıynsha tekserý júrgizilip jatyr, al «Qurylysshy-TBS» JShS lıtsenzııasynyń bir bóligi toqtatylǵan. Sondaı-aq «Alataý sapa qurylys» JShS tehnıkalyq qadaǵalaý quqyǵynan aıyrylǵan.

Eske salaıyq, buǵan deıin Almatyda káriz jelilerin durys júrgizbegen merdiger lıtsenzııasynan aıyrylǵanyn habarlaǵanbyz.