Almatyda eki kúnde aılyq jaýyn-shashyn mólsheriniń 76%-y jaýdy
ALMATY.KAZINFORM - Almatyda 10 qarasha keshten beri jańbyr jaýyp jatyr. Qazgıdromet málimetinshe, 11 qarasha saǵat 21:00-degi jaǵdaı boıynsha qalada 42 mm jaýyn-shashyn túsken. Bul aılyq normanyń 76%-y.
Almatynyń kommýnaldyq ınfraqurylym jáne turǵyn úı ınspektsııasy basqarmasynyń málimetinshe, buǵan deıin qalada jergilikti sý basýdyń segiz ýchaskesi anyqtalǵan.
“Almaty Tazalyq” qyzmetkerleri aryq júıeleri men sý ótkizý ótkelderin japyraq pen qoqystan jedel tazartty. Atalǵan segiz ýchaskeniń barlyǵy problemalyq aımaqtar tizimine engizildi. Anyqtalǵan kemshilikterdi joıý jumystary bıylǵy qarasha aıynyń sońyna deıin júrgiziledi dep josparlanǵan.
Almaty qalasy Tótenshe jaǵdaılar departamentiniń málimetinshe, saǵat 21:00-degi jaǵdaı boıynsha jańadan sý basý deregi tirkelgen joq.
- Qolaısyz aýa raıynyń saldaryn aldyn alý jáne joıý maqsatynda jalpy sany 1 579 adamnan turatyn 85 jedel brıgadanyń kezekshiligi uıymdastyryldy. Jumysqa 415 tehnıka, 97 motopompa jumyldyrylyp, shamamen 5 000 qum toltyrylǵan qap daıyndaldy. Kún saıyn kommýnaldyq qyzmettiń 3 250 jol qyzmetkerleri men 1 225 arnaıy tehnıkasy jumysqa jumyldyrylady, - delingen habarlamada.
Sınoptıkterdiń boljamynsha, túngi ýaqytta aýa temperatýrasy 0…–2 °C-qa deıin tómendeıdi.
Eske salaıyq, Almaty ákimdigi kommýnaldyq qyzmet kúsheıtilgen jumys rejımine kóshkenin habarlaǵan edi.
Al 11 qarashada qalada nóser jańbyr jaýyp, kóshelerdi, metro beketin sý basqan edi.
