Almatyda eki kúnde 25 sm qar jaýdy

Almatyda qar tazalaýǵa 410 birlik tehnıka men 876 jumysshy jumyldyryldy, dep habarlaıdy Kazinform.

Almaty ákimdiginiń málimetinshe, 29-30 jeltoqsan aralyǵynda Almatyda jańbyr men qar túrinde jaýyn-shashyn bastaldy.

"30 jeltoqsanda saǵat 10.00-degi jaǵdaı boıynsha qalada 10 sm, qalanyń joǵarǵy bóliginde 20-25 sm, Shymbulaqta 40 sm-ge deıin qar jaýdy", - dep habarlady ákimdikte.

Osyǵan oraı Almatyda 146 qum taratqyshtyń kúshimen 1502 tonna kóktaıǵaqqa qarsy materıaldar sebildi. Túngi saǵat 02.00-den bastap polıtsııanyń patrýldik mashınalary jol bastap júrýimen qar tazalaǵysh tehnıkalar joldardy qardan tazalady. Sondaı-aq, taýly aýdandarda qar shyǵarý jumysy uıymdastyryldy.

"Saǵat 10:00-degi jaǵdaı boıynsha 370 m3 qar shyǵaryldy. Almatyda 30 jeltoqsan saǵat 08.00-den bastap 410 birlik jáne 876 jumysshy jumyldyryldy", - delinedi habarlamada.

Sondaı-aq qalada trotýarlardy, jalpy paıdalaný oryndaryn, qoǵamdyq kólik aıaldamalaryn, jer ústi ótkelderin tazalaýǵa erekshe nazar aýdaryldy.
Aýdan ákimdikterinde jumys óndirisin baqylaý boıynsha kezekshilik uıymdastyryldy.

Qazgıdromettiń boljamy boıynsha búgin Almatyda kúndiz aýa temperatýrasy shamamen 0°C bolady. 6 qańtarǵa deıin jaýyn-shashyn kútilmeıdi.