Almatyda eki kópqabatty avtoturaqtyń jobasy ázirlenip jatyr

ALMATY. KAZINFORM – Almatyda aldaǵy ýaqytta kópqabatty avtoturaqtar salynady.

Qalalyq mobıldilik basqarmasyna qarasty Almaty parking mekemesiniń málimetinshe, megapolıste búgingi kúni trotýar túrindegi 12 myń oryn, alań túrindegi 6 myń oryn avtoturaq bar. Qala boıynsha turaqtardyń baǵasy - saǵatyna 100 teńge. Tek Jasyl bazar aýmaǵynyń janynda 150 tg/saǵat quny qoıylǵan.

Aýdan boıynsha avtoturaq sany eń kóp aýdan - Almaly, munda alty myńǵa jýyq turaq ornalasqan. Al avtoturaq eń az ornalasqan aýdan – Naýryzbaı aýdany, munda 75 oryn bar.

Kazinform saýalyna jaýap bergen Almaty parking mekemesi Almatyǵa aldaǵy ýaqytta turaqtar sany kópqabatty avtoturaq esebinen kóbeıetinin málimdedi.

- Qalalyq keńistikti tıimdi paıdalaný, kólik ınfraqurylymyn jaqsartý jáne avtoturaq oryndarynyń tapshylyǵy máselelerin sheshý maqsatynda «Almaty parkıng» KMK Medeý aýdany ákimi apparatymen jáne Almaty qalasynyń Qalalyq mobıldilik basqarmasymen birge «Samal-1» shaǵyn aýdanynda jer ýchaskesin tańdady. Bul jer ýchaskesi kópqabatty mehanızatsııalanǵan avtoturaqtardy salý úshin jobalyq-smetalyq qujattama ázirleýge berildi. Jumys jobasyna sáıkes, aýlalyq aýmaqtardyń júktemesin bosatý úshin 48 kólikke arnalǵan mehanızatsııalanǵan avtoturaq uıymdastyrý josparlanyp otyr, - dep habarlady mekemeden.

Odan bólek Almaty parking jaýabyna sáıkes, Almaty qalasynyń Qurylys basqarmasy qazirgi ýaqytta «Kóktem-3» shaǵyn aýdanynda (Bostandyq aýdany) kópqabatty avtoturaqty salýǵa arnalǵan jobalyq-smetalyq qujattamany ázirleý jumystaryn aıaqtap jatyr. Bul avtoturaq 207 kólik ornyna arnalǵan alǵashqy kommýnaldyq avtoturaq bolmaq.

Eske salaıyq, buǵan deıin Almatyda 16 jyldaı qurylysy toqtap turǵan kópqabatty avtoturaq súrilgenin jazǵanbyz.