Almatyda eki qabatty kafeden órt shyqty
ASTANA. KAZINFORM – Almatynyń Túrksib aýdanynda eki qabatty kafe ǵımaratynan órt shyǵyp, qutqarýshylar jarylý qaýpi bar alty ottegi ballonyn syrtqa alyp shyqty, dep habarlaıdy Tótenshe jaǵdaılar mınıstrligi.
Órt tańerteń erte bolǵan. Oqıǵa ornyna jetken órt sóndirýshiler ǵımarat shatyrynyń ashyq jalynǵa oranǵanyn anyqtady.
Barlaý jumystary barysynda kafeniń qosalqy bólmesi men shatyry janyp jatqany belgili boldy.
Jalynnyń kórshiles ǵımaratqa taralý qaýpi týyndaǵan. Alaıda órt sóndirýshiler órttiń basqa nysanǵa ótýine jol bermedi.
– Órtti sóndirý barysynda qutqarýshylar janý aımaǵynan ártúrli kólemdegi alty ottegi ballonyn syrtqa shyǵaryp, olardyń jarylý qaýpiniń aldyn aldy, – dep habarlady mınıstrlik.
Órt tolyq sóndirildi. Zardap shekkender joq.
Qazirgi ýaqytta órttiń shyǵý sebebi anyqtalyp jatyr.
Aıta keteıik, buǵan deıin Almatynyń Jetisý aýdanyndaǵy dámhanadan shyqqan órt 600 sharshy metr aýmaqty sharpyǵan edi. Sol kezde qutqarýshylar qaýipti aımaqtan bes gaz jáne eki ottegi ballonyn alyp shyǵyp, yqtımal jarylystyń aldyn alǵan bolatyn.
