Almatyda eki qabatty ǵımarat sot sheshimimen buzylyp jatyr
ALMATY. KAZINFORM — Almatyda Tilendıev kóshesi, 137 mekenjaıynda zańsyz salynǵan eki qabatty ǵımarat buzylyp jatyr.
Qala qurylysyn baqylaý basqarmasynan habarlaǵandaı, menshik ıesine ruqsat qujattarynyń tolyq bolmaýyna baılanysty ákimshilik shara qabyldanyp, buzýshylyqtardy joıý týraly nusqama berilgen.
— Keıin nysandy buzý týraly talap-aryz sotqa joldandy. Almaly aýdandyq soty nysandy zańsyz dep tanydy. Al ótken jyldyń 20 tamyzynda Almaty qalalyq soty birinshi satydaǵy sottyń sheshimin ózgerissiz qaldyrdy, — delingen basqarma habarlamasynda.
Sot sheshimin oryndaý maqsatynda menshik ıesi ǵımaratty buzý jumystaryn bastap ketti.
Osyǵan deıin Almatyda memlekettik qordyń jerinde zańsyz ornatylǵan statsıonarlyq emes saýda nysandaryn bólshekteý jumystary júrip jatqany týraly jazǵan edik.
Sondaı-aq Almatyda sońǵy eki jylda 65 zańsyz nysan, onyń ishinde turǵyn úı keshenderi tolyǵymen nemese ishinara buzylǵany týraly jazǵanbyz.