Almatyda eki aıda 6 myńnan astam samokat júrgizýshisine aıyppul salyndy
Almatyda qyrkúıek aıynan beri jol erejesin buzǵan 6 myńnan astam elektrli samokat júrgizýshisi jaýapqa tartyldy. Bul týraly qalalyq polıtsııa basqarmasynyń resmı ókili Saltanat Ázirbek málim etti, dep habarlaıdy Kazinform.
«30 tamyzdan bastap Qazaqstanda «Jol júrisi týraly» zańdaǵy elektr samokat miný erejelerin qarastyratyn túzetýler kúshine endi. Bastapqy kezeńde túsindirý jumystary júrgizildi. Sodan keıin QR ÁQBtK-niń 593, 622-baptaryna sáıkes shara qoldanyla bastady. Búgingi tańda samokat júrgizýshileriniń qatysýymen 6 myńnan astam jol erejesin buzý faktisi anyqtaldy. Olardyń barlyǵyna aıyppul salyndy», – deıdi Saltanat Ázirbek.
Zańda kórsetilgendeı, eń joǵary jyldamdyǵy saǵatyna 25 kılometrden aspaıtyn kólik quraly «elektr samokat» dep tanylady. Olardyń qozǵalysy úshin de tıisti oryndar aıqyndalady.
Sondaı-aq olardyń júrgizýshilerine tıisti shekteýler qoıylady.
Sharttar men erejelerdi saqtaı otyryp:
- elektr samokattardyń joldyń júris bóliginiń oń jaq shetimen qozǵalýyna ruqsat etiledi;
- júrgizýshi 18 jasqa tolǵan bolýy tıis;
- kólik quralyn basqarýǵa quqyq beretin kez kelgen sanattaǵy júrgizýshi kýáligi bolýy shart;
- shlem kııý mindetti.
- qarańǵy ýaqytta qozǵalý kezinde basqa kólik quraldarynyń júrgizýshilerine kórinýi úshin jaryq túsiretin belgiler ornatylýy qajet.
- trotýar nemese jaıaý júrginshiler jolymen saǵatyna 6 kılometrden aspaıtyn jyldamdyqpen júrý shart;
