Almatyda eki adamdy poıyz qaǵyp ketti: kólik polıtseıleri qazaqstandyqtarǵa úndeý jasady

ALMATY. KAZINFORM – Jyl basynan beri elimizdiń temir jolynda 39 adam jaraqat aldy, onyń ishinde balalar da bar. Bul týraly Kóliktegi polıtsııa departamenti bastyǵynyń orynbasary Ońdasyn Ashtaev málim etti.

Onyń aıtýynsha, qaıǵyly jaǵdaılar kóbinese azamattardyń temir jolda qarapaıym qaýipsizdik erejelerin saqtamaýy saldarynan bolady. Ádette, belgilenbegen jerlerden temir joldy kesip ótý, asyǵystyq, nemquraılylyq, jaıaý júrginshilerge arnalǵan kópirlerdi, jerasty jáne arnaıy ótkelderdi paıdalanbaý osyndaı jaǵdaılarǵa ákep soǵady.

– Jýyrda Almatyda poıyz eki adamdy qaǵyp ketti. Qaıǵyly oqıǵa adamdardyń belgilenbegen jerde temirjoldan ótýge árekettenýi saldarynan boldy. Atalǵan derekter boıynsha tergeý jumystary júrgizilýde. Bul oqıǵalar temirjol mańynda qaýipsizdik erejelerin qatań saqtaý qanshalyqty mańyzdy ekenin aıqyn kórsetedi, – dedi ol.

Jyl basynan beri osyndaı 39 fakti tirkeldi, onyń jartysynan kóbi adam ólimimen aıaqtaldy. Olardyń arasynda kámeletke tolmaǵan jáne kishkentaı balalar da bar.

–Temirjol kóligi ınfraqurylymynda bógde tulǵalardyń bolýy olardyń ómiri men densaýlyǵyna qaýip tóndirip qana qoımaı, temirjol jolaýshylary men qyzmetkerleriniń qaýipsizdigine, júkterdiń tutastyǵyna jáne jalpy qozǵalys qaýipsizdigine qater tóndiretini anyq, – deıdi polıtseı.

Ol azamattardy meılinshe qyraǵy bolýǵa jáne temirjoldaǵy tártip erejelerin múltiksiz oryndaýǵa shaqyrdy.

Sondaı-aq, tártip saqshylary ata-analardan balalaryna temirjoldyń oınaıtyn jer emes ekenin barynsha túsindirýdi suraıdy.

Ómirińiz ben densaýlyǵyńyzdy saqtaý úshin mynany este saqtańyz:

- temirjoldy arnaıy belgilengen jáne jabdyqtalǵan jerlerden ǵana jáne júrip kele jatqan poıyz, lokomotıv nemese vagondardyń joqtyǵyna tolyq kóz jetkizgennen keıin ǵana kesip ótińiz;

- stantsııalar men aınalymdarda vagondardyń astynan ótpeńiz nemese avtomatty qosqyshtardyń ústinen sekirmeńiz;

- sonymen qatar, temir joldan óterde qulaqqap pen uıaly telefondy paıdalanýǵa qatań tyıym salynady.

Temirjolda jeke qaýipsizdiktiń qarapaıym erejelerin buljytpaı oryndaý arqyly siz ózińiz ben jaqyndaryńyzdyń ómirin saqtaı alasyz.

Maýsym aıynyń sońynda Almaty mańynda poıyz eki adamdy basyp ketken bolatyn.