Almatyda egde jastaǵy naýqastarǵa narkozsyz júrek qaqpaqshasyn aýystyrý otasy jasaldy

ALMATY. KAZINFORM — Almaty kardıologııa ortalyǵynda transkateterlik ımplantatsııa (TAVI) ádisimen aortalyq qaqpaqshany aýystyrý boıynsha eki joǵary tehnologııalyq ota sátti júrgizildi. Az ınvazıvti aralasý aortalyq qaqpaqshanyń krıtıkalyq stenozy dıagnozy qoıylǵan 72 jáne 77 jastaǵy naýqastarǵa jasaldy. 

Qalalyq densaýlyq saqtaý basqarmasynyń málimetinshe, bul otanyń basty ereksheligi — narkozdyń qoldanylmaýy. Naýqastar esin saqtap, ota barysyn jeńil kóterdi. Mundaı tásil asqyný qaýpin edáýir azaıtyp, saýyǵý úderisin jedeldetedi. Bul, ásirese, qosymsha syrqaty bar egde jastaǵy adamdar úshin óte mańyzdy.

— Aortalyq qaqpaqshanyń krıtıkalyq stenozy kezinde júrek sol jaq qarynsha men qolqa arasyndaǵy qysymnyń shamadan tys aıyrmashylyǵyna baılanysty aýyr júkteme túsedi. Ýaqytyly medıtsınalyq kómek kórsetilmese, bul júrek bulshyqetiniń álsirep, jıyrylý qabiletinen aıyrylýyna ákeledi, — delingen habarlamada.

Interventsııalyq kardıolog Orazbek Sahovtyń aıtýynsha, mıokardtyń qalpyna kelý múmkindigi áli saqtalǵan sátti ótkizip almaý asa mańyzdy.

— Aýrý asqynyp ketken jaǵdaıda, qaqpaqshany sátti aýystyrǵannyń ózinde júrektiń burynǵy qalpy men qyzmetin tolyq qalpyna keltirý árdaıym múmkin bola bermeıdi, — deıdi ol.

Ota keýde qýysyn ashpaı jasalady. Qaqpaqsha san arterııasy arqyly júrekke jetkizilip, rentgen jáne ýltradybystyq baqylaýmen ornatylady. Kardıologııa ortalyǵynda mundaı joǵary tehnologııaly otalar úsh jyldan astam ýaqyt boıy sátti júrgizilip keledi. Osy kezeńde 80-nen astam kúrdeli ota jasalǵan.

Eske salaıyq, buǵan deıin Almatyda dárigerler júkti áıeldiń sábıine zııan keltirmeı júrekke ota jasaǵanyn jazǵanbyz.